Волжский районысо школлаште туныктышо ден образованийын пашаеҥже-влак Специальный военный операцийыште участвоватлыше военнослужащий-шамычлан вӱрым пуымо всероссийский акцийыш ушненыт.
Иза-шольо ден ака-шӱжарым йӧраташ, поро кумылан лияш кӱлмым чапле примерышт дене Сотнур ден Шарача школ-влакын педагогышт ончыктеныт. 11 апрельыште нуно Волжск оласе плазме рӱдерыште спецоперацийыште нелын сусыргышо сарзына-влакын илышыштым арален кодымо лӱмеш шке вӱрыштым уло кумылын пуэныт.
– Таче Специальный военный операцийыште участвоватлыше военнослужащий-шамычлан вӱрым пуымо всероссийский акцийыш Юлсер кундемын кок школжо гыч шым туныктышо ушненна, 20 апрельыште вӱрым налме рӱдерыш эше латик педагог каяш кутырен келшенна, – каласкала Шарача школышто информатикым туныктышо Денис Смирнов (снимкыште). – Коллегем-шамычын мутышт почеш, тӱҥжӧ – спецоперацийыште участвоватлыше сарзына-влаклан чылажат ситыже. Тидымак шотыш налын, Волжский районысо калык военнослужащий-влаклан спецопераций тӱҥалме жап гычак тӱрлӧ семын полша. Кызыт поснак туныктышо-шамычын вӱрым пуымо акцийыш ушнымышт куандара.
– Мыйын шонымаште, тазалык шотышто иктаж уто-сите уке гын, спецоперацийыште сусыргышо сарзына-шамычлан кажныланна вӱрым пуаш кӱлеш. Айдеме илышыштыже вӱрым ик гана веле пуэн кертеш гынат, тудо уже герой. Вес еҥын илышыжым утарыше герой! – палемда Сотнур школышто ОБЖ-ым туныктышо Олег Васильев.
Тыге, спецоперацийыште кажныже участвоватлен огына керт, а теве тушто илаш-колаш кредалше сарзына-влаклан чыланат мо дене гынат полшен сеҥена. Мутлан, донор, шке вӱржым пуэн, весын илышыжым утарен кода да тыгодым йӧршын нимом ок йомдаре, молан манаш гын тӱнялан ыштыме порылыкшо шкеж деке икмыняр пачаш ешаралтын пӧртылеш. Донорство – улыжат медицине процедур, илышнам кеч изиш сайракым ышташ полшышо проста йӧн.
Тазалык шотышто вӱрым пуаш чарак уке гын, 18 ияш деч кугурак ийготан, 50 килограмм деч кугурак нелытан, 1 ий деч шагал огыл жап россий гражданстван чыла еҥ донор лийын кертеш. Но татуировко ден пирсингым ыштыктыме, имым керыктен эмлалтме годым 120 кече, ангине, грипп да ОРВИ деч эмлалтме деч вара 30 кече, мӱшкыран улмо годым да азам ыштыме деч вара 1 ий, чызым пукшымым чарныме деч вара 90 кече, прививкым ыштыктыме деч вара вӱрым пуаш чаралтеш.
Вӱрым пуаш кумылан еҥын пеленже паспорт але личностьым пеҥгыдемдыше вес документ (военный билет, РФ гражданинын личностьшым пеҥгыдемдаш жаплан пуымо 2П №-ан удостоверений, морякын паспортшо) лийшаш.
– Донор акцийын кажне участникшылан тунемме (паша) деч кок кечылан утарыме нерген справкым да кочкаш компенсацийым пуат. Волжск оласе плазме рӱдер Грибоедов уремысе 2-шо №-ан пӧртыштӧ верланен, тудо рушарня деч моло кечын 8 гыч 16 шагат йотке кечывал деч посна пашам ышта, – Специальный военный операцийыште участвоватлыше военнослужащий-шамычлан вӱрым пуымо всероссийский акцийыш землякше-влакым ушнаш ӱжын палемда Д.Смирнов.
М.ИВАНОВА
Д.Смирновын фотожо
