Российын Обороно министерствыже специальный военный операцийыште увер деч посна йомшо але вуйым пыштыше военнослужащийын родо-тукымжылан памяткым ямдылен.
Темлымаш-влак сарзым писынрак кычал мумашке да военнослужащийын родо-тукымжылан закон дене пеҥгыдемдыме тӱрлӧ права дене пайдаланаш йӧным ыштымашке виктаралтыныт.
Икымше ошкыл
Кугыжанышлан социальный выплатым ышташыже тыланда военнослужащий дене родо улмым пеҥгыдемдыше документым да кычалме пашам тӱҥалашыже тудын дене кылдалтше нине уверым погаш темлалтеш:
- паспортын, СНИЛС-ын да ИНН-ын данныйыштым;
- личный номержым;
- пытартыш гана кунам да кушеч йыҥгыртымыжым;
- ротын, полкын да воинский частьын номерыштым;
- пеленже лийын кертше арверым (кидшолым, амулетым, шӱйыш сакыме ыресым да тулеч молым);
- ойыртемалтше палым (капкылыштыже пӱрнен кушмо верым, татуировкым, шочмо палым, оҥылашлу да шӱргӧ кундемысе снимкым).
Кокымшо ошкыл
Чыла документ ден уверым поген ситарымеке, военный комиссариатыш кайыман.
Тушто лишыл еҥда нерген увертарыше да палдарыше картым ыштышашлан данный-влакым пеҥгыдемдаш темлат.
Шотыш налза! Чыла увер, эсогыл кӱлдымылан шотлымо, лишыл еҥым кычал муаш полшен кертеш!
Кумшо ошкыл
Военный комиссариатыште увер деч посна йомшо (тиде печать дене ӱшандарыме извещений дене пеҥгыдемдалтеш) военнослужащийын пашадаржым да йочаже-шамычлан тылзе еда ойыралтше социальный выплатым налашлан йодмашым пуаш темлат.
Тидлан пелен лийшаш:
- военнослужащийын пелашыже, йочаже, а нуно уке улыт гын, ача-аваже нерген увер да кажнын телефон номерже;
- кажне еҥын йодмашыже;
- сарзын увер деч посна йоммо кече марте палемдалтше пашадаржым колташ кажне еҥын банк счётшын реквизитше;
- йочалан тылзе еда выплатым налаш йодмаш, тудын пелен йодмашым пуышын кӧ улмыжым пеҥгыдемдыше паспортын, йочан шочмо нерген таныкшын, родо улмым пеҥгыдемдыше документын копийыштым, моло документым: инвалидность нерген справкын копийжым, образовательный тӧнеж гыч справкым, опеке да попечительстве органын опекуным (попечительым) палемдыме нерген пунчалжым, военнослужащийын документлан келшен толшо 2-3 фотожым пыштыман.
Нылымше ошкыл
Биоматериалым сдатлаш кӱлеш.
Военный комиссариат генетический анализым ышташлан (ДНК-лан) биоматериалым сдатлаш темла. Тиде лишыл еҥым кычалме пашаште моткоч кӱлешан йыжыҥ!
Биоматериалым кушто сдатлыман?
Тидым шке регионысо «Защитники Отечества» кугыжаныш фондын филиалже-влак кокла гыч иктыштыже яра ыштен кертыда. Биоматериал ден генотипын результатыштым военный комиссариатыште, тыгак «Защитники Отечества» кугыжаныш фондын филиалыштыже рашемден кертыда.
Биоматериалым кӧ сдатлен кертеш?
Ава, ача, шочмо иза-шольо але ака-шӱжар, нунын укешт годым – кова, коча. Военнослужащийын биологический родыжо уке гын, шкем йытырайыме арвержым (бритвым, вуйшергем, пӱйым эрыктыме щёткым) сдатлаш лиеш.
Кузе эскераш да мом ышташ?
СВО-што йомшо лишыл еҥда нерген чыла уверым налме деч вара военный комиссариат тендам тудын статусшо дене кажне 10 кече гыч палдарышаш, а статус вашталтмеке – вигак!
Военнослужащийын пленыш логалмыж нерген пален налында гын, тидым вигак военный комиссариатыш увертарыза.
Тидын деч шекланыза!
*Лишыл еҥдам кычалме нерген увертарымашым, тыгак персональный данныйдам тӱрлӧ сайтыште ида вераҥдыл;
*телефон дене шкендан нерген ида каласкале, СМС дене колтымо код ден парольым иктыланат ида ойло, интернет-ресурсышто палыдыме ссылке почеш ида эрте;
*поснак оксала кычал муаш темлыше организаций-влаклан ида ӱшане. Тиде мошенник-влак лийын кертыт!
Кычалме чыла пашам Российын Обороно министерствыже яра шукта.
Пайдале кыл:
- Кугыжаныш да муниципал услуго порталыште СВО-што увер деч посна йомшо участник-влакын ешыштлан www.gosuslugi.ru/landing/search_military лаштык уло;
- Россий Федераций Вооруженный Вийын психологий велым полшымо телефонжо: 8-800-550-67-98;
- Россий Федераций Обороно министерствын Военно-социальный рӱдержын шокшо линийже: 117 (ешартыш 2);
- «Защитники Отечества» кугыжаныш фондын шокшо линийже: 117 (ешартыш 1);
- Военный комиссариатын пашаче группыжо.
Маргарита Иванова ямдылен.
