Марий Эл правительстве предпринимательствым вияҥдаш, регионын турист куатшым пеҥгыдемдаш, ялозанлык отрасльлан кадрым ямдылаш Россельхозбанк дене кылым умбакыже шуяш палемден.
Регион вуйлатыше Юрий Зайцев Россельхозбанкын Марий филиалжын директоржо Владимир Рогозин дене пашаче вашлиймашым эртарен. Видеоконференций режим йӧн дене совещанийыш Россельхозбанк правлений председательын алмаштышыже Денис Константинов ушнен.
«Тидыже куандара: банк клиент-влакым шукемдыме политикым эртара. Сатум ыштен налшына-влаклан льготан программылашке ушнаш йӧн кунар шукырак лиеш, тичмаш налмаште лектыш тунарланак кугемеш. Регионыштына АПК кугу верым айла, валовый региональный продукцийже 17 процентыш шуэш. Пырля пашам ыштышаш направлений ятыр. Тӱҥжӧ – ялыште илыше-влак улшо полышым пален шогышт», – палемден Юрий Зайцев.
Совещаний годым регионын правительствыж да кредит-финанс организаций дене ыштыме вашкылым умбакыже шуяш кӱлмым каҥашыме. Госпрограмме дене келшышын, льготан кредит дене финансым ойырымо инвестиций проект направленийым вияҥдыме нергенат ойлымо.
«Россельхозбанкын АПК-лан кердитым ойырымо кугыт 90 процентыш шуэш, сезон пашалан пуымо кредит – 81 процентыш. Марий Элыште банкын полшымыж дене «Акашевский» сурткайык фабрикыште, «Первый май» колхозышто, «Шернур сыр завод» ЗАО-што кугу инвестиций проект-влак илышыш шыҥдаралтыт» – каласен Денис Константинов.
Россельхозбанк правлений председательын алмаштышыже Юрий Зайцевым АПК специалист-влакым ямдылыме «Я в Агро» шинчымаш платформо дене палымым ыштен. Проектым Россий Ялозанлык министерствыште сайлан шотленыт. Тидлан кӧра ончыкылык профессионал-влакым «Агрокласс» проект кышкарыште эше школ гычак ямдылаш тӱҥалыт.
«Фермерын школжо» образовательный проектым каҥашеныт.
Вашлиймаште тыгак СВОЕ цифр экосистеме нерген ойленыт. Тушто марий фермер-влак Свое Родное маркетплейсыште шке сатуштым ужален кертыт. Тыгак ялысе путешествий агрегатор полшымо дене туризмым вияҥдаш йӧн уло.
Денис Речкинын фотожо
