«Усталык сомыллан айдемак веле кӱлеш», – манеш тачысе лаштыкын унаже Егор ФЕДОРОВ. Рвезе Йошкар-Олаште шочын-кушкын. Кӱшыл шинчымашым Марий кугыжаныш университетыште пога. Марий йылме да литератур туныктышо лияш ямдылалтеш. Тыгак IT-технологийлам шымла.
– Самырык марий-влак кокла шкеныштым руш еҥлан шотлышо ятырын улыт. Тый, олаште кушшо рвезе, марий шӱлышым кузе арален коденат?
– Тыгай йодышым шуко гана колаш логалын. Марий еш гыч улам. Йоча годсек мый денем шочмо йылме дене кутыреныт. Тудым йӧраташ, пагалаш поснак авам туныктен. Тудо марий йылме, литератур, руш йылме туныктышо лийын. Ятыр жап йоча садыште тыршен.
– Егор, тый калыклан радиовӱдышӧ семын палыме улат. Но кызыт тушто йӱкетым огына кол…
– Тыге. Ты паша гыч шукерте огыл кораҥынам гынат, радио ешым, колыштшо-влакым уло шӱмем дене йӧратем. Журналист сомылым шукташ, уста еҥ-влак дене вашлийын палыме лияш мылам моткоч келшен. Редакций шочмо суртемла чучын.
Кеч-могай пашан шке нелылыкше уло. Ончыч эфирыш лекташ моткоч тургыжланем ыле. Садлан йоҥылыш-влак лийыныт. Но тидыже умбакыже тунемаш, шукырак марла кутыраш кумылаҥденыт. Тыге эркын йылмемат лывырген, йӱкемат вашталтын. Тиде опытым эртымемлан пеш куаненам.
Кызыт IT-технологий-влак чонемлан лишылракла чучыт. Тыге вес аланыште шкем вияҥдем.
– Палем, университет илышыштат пеш чолга улат.
– Тунемме годым мом гына ыштен ончаш ок логал! Икымше курс гычак тӱрлӧ мероприятийыш ушнем. «Голос юности», «Студент шошо» фестиваль-влак, волонтёр паша, тӱрлӧ форум ден конференций-шамыч – чылаже шотленат от пытаре. Но кызытрак утларак жапым тунеммашлан, пашалан ойырем.
– Тый МарГУ пеленысе «Марий Мурсем» ансамбльыш коштат. Кушташ кӧ шӱмаҥден?
– Школышто икымше гыч латикымше класс марте «Шокто Гармонь» йоча фольклор ансамбльыш коштынам. Шоналташ веле, ынде иктаж 14-15 ий куштем. Ом шылтале, тунемме годым ты сомылым пешыжак йӧратен омыл. Но авам эре тыге ойлен: «Кошт эргым, эше кӱлеш лиеш». Тунам тидым умылен омыл. Но кызыт шижам, авам чын лийын. Ынде шкежат тӱрлӧ куштымашым куанен ончем. Сцене гыч могай сылнын коеш улмаш.
Университетыш тунемаш пурымек вигак «Марий Мурсем» ансамбльыш ушненам. Эше «Ныжыл сем», «Салика» коллективлаште куштем. Умбакыжат хореографийым йӧратыме кумылем ок йом манын ӱшанем.
Коллективыш у еҥ толмылан моткоч куанем. Самырык-влак марла куштынешт, мурынешт. Нуно шке шочмо калыкыштым йӧратат, пагалат да тӱвырам арален кодымо верч тыршат.
– Instagram лаштыкет гыч коеш: путешествийым йӧратет…
– Йолташем-влак дене пырля вес олалаш чӱчкыдын кудалыштына. Умбакыже вес элыш миен толнем, курыкым ужнем.
Корно – тиде эрык. Лач тушто уш гыч оккӱл шонымаш йӧршын лектын возеш. Илышын тамже утларак шижалтеш.
– Радио деч вара ик IT-технологийлан шӱмаҥынам маньыч…
– Чынак. Мый ик компанийыште веб-дизайнерлан тыршем.
Веб-дизайнер – эртыше жапын, тачысе кечын да ончыкылыкын профессийже. Вет дизайнер-влак акрет годсек лийыныт. Мо мемнан йыр уло, чыла нуно шонен луктыныт: лакан совлам, ныл йолан ӱстелым… Икымше книгамат лудшылан йӧнаным ыштеныт. Кажне кечын кучылтмо арвер гыч тӱҥалын компьютер да тӱрлӧ программе марте чыла моторын келыштареныт.
Тыгак кызыт ux/ui дизайнерлан тунемам. Тидыже ты сомылым эшеат келгынрак шымлаш полша.
– Ты профессийым налаш шонышо самырык-влаклан могай ой-каҥашым пуэт?
– Тиде творческий паша манам гын, йоҥылыш ом лий. Кеч-могай усталык сомылым айдемак веле шуктен кертеш, робот тудым нигунам ок алмаште. Садлан паша деч посна шинчен огыда код. Сай специалист-влак кӱкшын аклалтыт.
Тыланымашем тыгай лиеш: тунемаш ида ӧркане! Тӱня моткоч вашке вашталтеш, кажне минутышто у программе-влак «шочыт». Садлан, профессийыш ушнаш шонеда гын, уэмдымаш-влакым эреак шымлен шогыза. Жап дене тӧр ошкылза.
– Ончыкылык корнет волгыдо лийже, Егор!
– Тау!
О.МОШКИНА
