Йоча – илышын куанже. Ешыште икшыве кушкеш гын, пиална тичмаш. Нунын дене пырля, ийготым шижде, ме юарлена, нуным ончен, илышын сӧралжым ужаш тунемына, нунылан кӧра шкенам эшеат виян, чыла осалым сеҥен кертше улына.
Марий артист ден мурызо-влакын икшывышт урок деч вара ешартыш шинчымашым кушто налыт? Ончыкыжым кӧ лийнешт?
Светлана Осипова, Марий Элын калык артистше:
– Кугурак эргым-влак ешан улыт: иктыже – 32, а весыже 20 ияш. Женя Мурманскыште ила, «Североморск» корабльыште III ранган капитан, офицер, а Максим Йошкар-Оласе радио-механический техникумышто газовиклан тунемеш. 11 ияш Маша ӱдырем англичан йылмым тунемаш кумылан, а 8 ийым темыше Серафима ӱдырем Палантай лӱмеш Тӱвыра да сымыктыш колледж пеленысе Йоча сымыктыш школышто скрипкым шокташ тунемеш. Ӱмаште республик кӱкшытан конкурсышто икымше верымат сеҥен налын ыле.
Марина Почтенева, Марий Элын сулло артистше:
– Кугурак эргына МарГУ-што агроинженерлан тунемеш, а изиракше мемнан семын усталык шӱлышан. Тудо Палантай лӱмеш тӱвыра да сымыктыш колледжын Национальный гимназийыштыже шинчымашым нӧлта, трубам шокта. Ончыкшым музыкант лияш шона.
Олег Славин, Марий Элын сулло артистше:
– Рома 8-ше классыште тунемеш, спортлан шӱман. Иймаш дене спорт мастерыш кандидат нормым шукташ тырша. Тудо – Олимпийский резерв школын воспитанникше. Россий кӱкшытан ятыр таҥасымаште призёр лийын. Изажым ончен, шӱжаржат спортын тиде видшылан шӱмаҥын. Кокымшо классыште тунемше Рада ӱдырна кокымшо ий иймашке да художественный школыш коштеш. Тудо сӱретлаш, тӱрлӧ материал гыч ненчаш йӧрата. А эн изиракна – Володя, 4 ияш, йочасадыш коштеш. Вова мураш йӧрата, почеламутымат сылнын лудеш. Ӱмаште Марий тиште кече вашеш эртаралтше конкурсышто «Велосипед» почеламутшо дене эсогыл икымше вер дене палемдалтын.
Эльвира Виногорова-Токташева, Самырык-влаклан Олык Ипай лӱмеш кугыжаныш премийын лауреатше:
– Максим эргым Казаньысе Суворовский военный училищын 7-ше классыштыже тунемеш. Тудо изинекак сӱретлаш кумылан, сандене туштат тыгай кружокышто мастарлыкым пога. А Юля ӱдыремлан 8 ий. Тудо кушташ йӧрата, «Онар» ансамбльыш коштеш. Тыгак англичан йылме дене ешартыш шинчымашым налеш.
Ирина Якаева, мурызо:
– Аня 11 классышгте тунемеш. Школ деч вара икмыняр предмет дене репетитор-влак деке урокыш коштеш, вебинарым колыштеш, тӱрлӧ курсыш миен толаш тырша, библиотекышкат кече коден манме гаяк куржталеш. Ончылно ЕГЭ вуча, сандене шуко жапым тунеммашлан ойыра. Ӱдырем аважын але ачажын корныжым тапташ шона: журналистике але юридический направлений дене специальностьым налнеже.
