Марий Элыште у пайремым – Шуко шочшан ешын кечыжым – палемдаш тӱҥалына.
Тиде пайрем 2025 ий 28 март гыч илышыш пура да талук еда эртаралташ тӱҥалеш. Тений гычак регионыштына еш-влаклан полшымо у мере-шамычым ыштат. Мутлан, очный формо дене тунемше мӱшкыран ӱдырамаш-шамычлан 100 тӱжем теҥге кугытан выплатым ик гана пуат; шуко шочшан ешыште икшыве-шамыч кокла гыч иктыжым туныктымылан тӱлымӧ суммо гыч пелыжым компенсаций шот дене пӧртылтен кертыт; кумшо да тылеч моло йоча шочмо годым ешлан ипотекым шӧраш палемдалтше выплатым 1 миллион теҥге марте кугемдат. Тыгак тений азам ончымо арверым прокатыш пуымо пункт-влакым почыт, 3 ияш марте ийготан икшывым кӱчык жаплан кодаш кӱлмӧ годым социальный нянян услугыжлан эҥерташ йӧным ыштат.
Чыла тидын нерген 14 январьыште Г.Константинов лӱмеш руш академический драме театрыште Ешын идалыкшым торжественно петырыме мероприятийыште Марий Элым вуйлатыше Юрий Зайцев увертарен.
«Пеҥгыде еш-влак республикнан пеледалтмыжым да вияҥмыжым ончыктат. Ава ден йочам социально аралымаш, медицине да шинчымашым пуымо услуго-влакын качествыштым саемдымаш, тичмашын канаш да спорт дене заниматлалташ йӧным кугемдымаш – чыла тиде регионыштына еш-шамычлан полшымо, йоча-влакым воспитатлаш йӧным пуымо шот дене ышталтеш», – манын Марий Элым вуйлатыше.
Идалыкын ешыжым петырыме церемонийыш ӱжмӧ еҥ-влакым марий парламентын лӱмжӧ дене Кугыжаныш Погынын председательже Михаил Васютин саламлен.
«Российлан еш – тиде элын негызше, да Идалыкын ешыже тудым эшеат пеҥгыдемдаш полшен, – палемден тудо. – Идалыкын ешыжым иктешлаш гын, кугыжаныш орган, мер организаций да республикыште илыше-влак пашам пырля ыштымына дене ончылан шындыме шуко задачым шуктен кертынна. Ме самырык ешлан полшымо, йочам воспитатлыме у йӧн-шамычым ыштенна, тыгак тукым-влак кокласе кылым пеҥгыдемдаш полшенна».
Еш идалыкын кышкарыштыже регионыштына тӱжем утла мероприятийым эртарыме. Еш, йӧратымаш да ӱшанле улмо кечын вич ешлан Марий Элым вуйлатышын Чап знакшым кучыктымо, 70 мужырлан – «Йӧратымылан да ӱшанле улмылан» медальым.
«Марий Элын ешыже» проект кышкарыште верлаште ача-ава-влак дене вашлиймаш-шамычым эртарыме. Нунын негызеш 435 тӱҥалтышым радамлен ямдылыме.
«Россий» ончерыште Марий Элын чапшым «Идалыкын ешыже» всероссийский конкурсышто сеҥыше Шабдаровмытын ешышт арален. Нуно мемнан стендыште Россий президентын администрацийжым вуйлатыше Сергей Кириенколан экскурсийым эртареныт.
2024 ийыште шуко шочшан ешын статусшым федерал кӱкшытыштӧ пеҥгыдемдыме, ушештарен Юрий Зайцев. Регионыштына «Марий Эл Республикыште шуко шочшан еш да нунылан социально полшымо мере-влак нерген» законым лукмо.
Еш идалыкым иктешлыме, но республикыштына еш-шамычлан умбакыжат полшаш тӱҥалыт.
«Тений гыч икымше йочам ыштыше ача-ава-влак шочшыштлан пӧлекым налыт, еш клуб, «Икымше-шамычын толкынышт» первичный пӧлкалаште почмо школысо паша отряд, «Кызытсе тимуровец-влак» добровольческий отряд-шамыч пашам ышташ тӱҥалыт», – палемден регионым вуйлатыше.
2025 ийыште Россий президент Владимир Путинын кӱштымыж почеш «Еш» у национальный проектым илышыш пуртымо. Тушто улшо вич федеральный проект еш-влакын илыме верыштым саемдымашке, элыштына йоча шочмо чотым кугемдымашке, еш институтым пеҥгыдемдымашке виктаралтын.
Торжественный мероприятийыште регионысо эн сай еш-шамычым палемденыт. Марий Элым вуйлатышын Тауштымо серышыжым Демидовмыт, Рыбаковмыт да Шаблиймыт еш-влаклан кучыктеныт. «Марий Эл Республикын эн сай паша династийже» отличий знак дене Олег Яндулиным палемденыт. Республикнан Паша да социальный аралымаш министерствыже «Россий» тӱнямбал ончер-форумыш чолган ушнымыжлан шарнымашан медальым налын.
Кугыжаныш Погын председательын Тауштымо серышыжым тӱрлӧ проектыш, фестивальыш да конкурсыш кумылын ушнышо шуко шочшан ача-ава-влак Сергей ден Анастасия Ортинмытлан, Денис ден Надежда Николаевмытлан, Алексей ден Марина Васильевмытлан, Андрей Анисимов ден Елена Александровалан кучыктеныт.
Марий Эл Республикым вуйлатышын да Кугыжаныш Погынын пресс-службыштын уверышт негызеш Маргарита ИВАНОВА ямдылен