Йошкар-Ола мэрын пашажым жаплан шуктышо Антон Трудинов кок тулык икшывылан пачер сравочым кучыктен.
Самырык еҥ-влак ынде Медведево районысо Шойбулак селаште илаш тӱҥалыт. Тидланже тыште чыла: школ, стадион, тӱвыра да тазалык аралтыш тӧнеж-влак – уло, а Йошкар-Ола марте – улыжат 15 минут кудалаш.
Антон Трудинов у пачер оза-шамыч дене ончыкылык илышышт нерген мутланен, тыгак илыме верым кучымылан да коммунал услугылан жапыштыже тӱлаш кӱлмым палемден.
«Нине пачер-влак чынже денак шокшо еш пыжаш лийыт манын ӱшанем. А Марий Элын правительствыж дене пырля тулык йоча-шамычлан ончыкыжат шке илыме веран лияш, эрласе кечыш ӱшанлын ончаш полшаш тӱҥалына», – палемден Антон Трудинов.
Маргарита ИВАНОВА.
Йошкар-Ола мэрийын пресс-службыжын фотожо.
