Республикым социально-экономически вияҥдыме индивидуальный программын кышкарыштыже ветеринар лабораторийын корпусшым чоҥаш тÿҥалме.
Республиканский ветеринар лабораторийын у лабораторный корпусшым чоҥымо нерген йодышым 15 февральыште Марий Эл правительствыште онченыт.
«Тиде йодыш республикыште илыше кажне еҥ, кугу ялозанлык предприятий да шке озанлык дене кылдалтын. Теме корпусым чоҥымо шотыштат, зданийыш кызытсе жаплан келшыше оборудованийым шындыме денат кÿлешан. Объект неле, тудым чоҥаш да оборудований дене шыҥдараш жап шагал – чылажымат тений ыштен шуктыман», – совещанийым тÿҥалмеке палдарен республикым вуйлатыше Александр Евстифеев.
Марий Эл Ветеринарий комитетын председательже Валентина Вавилован каласкалымыж почеш, кызытсе ветлабораторийым 1965 ийыштак чоҥымо. Таче кечылан тудо у йодмаш-влак дене келшен огеш тол: шымлымашым эртараш помещений огеш сите, зданий морально тоштемын, сандене чапле да виян оборудованийым шындаш йöн уке. Тыгодымак шымлыме пашан чотшо палынак кугемын: ончыч корма да кормалык ешартыш дене кылдалтше 400 шымлымашым эртарыме гын, кызыт 1100 деч шагал огыл материалым шымлаш логалеш. Ветлабораторий тыгак кочкыш продуктын качествыж ден лÿдыкшыдымылыкшым контрольышто куча, ветеринар-профилактике, эмлыме пашам шукта да моло ветеринар услугым пуа.
«Республикысе агропромышленный комплексын шуко продукцийже регион деч öрдыжкö колталтеш, сандене, лÿдыкшым тичмашнек кораҥдаш манын, нине шымлымаш-влак моткоч кÿлыт. Тылеч посна, эртыше ийын биологический лÿдыкшыдымылык нерген закон лектын. Тудын тÿҥ йодмашыже сурт вольыкым ончымо аланыште кучылталтше антибиотикым шымлыме дене кылдалтын. Тиде вещества калык деке миен ынже шу манын, продукцийым кумданрак да келгынрак шымлаш кÿлеш. У корпусым моткоч вучена, да тунам российысе веле огыл, тÿнямбалысе йодмаш-влакланат келшен толын кертына», – рашемден В.Вавилова.
Марий Элын чоҥымо паша, архитектур да илыме-коммунал озанлык министрже Михаил Степанов объектым палемдыме график деч почеш кодде чоҥымо нерген ойлен. Бетон пашам шуктымо, опалубкым ямдылыме, оратам ыштыме деч посна кызыт чоҥымо кумдык гыч оралте-влакым кораҥдат.
Совещанийыште у лабораторный корпусым технически шыҥдарыме йодышым посна лончыленыт.
«Мыланна кызыт келшыше оборудованийым налаш да тудын дене грамотно пашам ыштен кертше специалист-влакым ямдылаш кÿлеш. У лабораторий республикысе агоропромышленный комплекслан да калыклан пашам ыштышаш. Тиде илышын качествыж дене кылдалтше ик эн серьёзный объект», – республикын ялозанлык да продовольствий министрже Андрей Кондратенколан манын А.Евстифеев.
Ончылгоч шотлен лукмо почеш, ветлабораторийын у корпусышкыжо шындаш палемдыме оборудованийым налаш 88 миллион утла теҥге кÿлеш. А объектым чоҥымо чумыр пашан акше 126 миллион утла теҥгеш шуэш.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен
