Кевытем Хлебниково села покшелне корно воктене верланен. Еҥ коштмо верыште манаш лиеш. Санденак тудым кумдаҥдаш шонымо ыле. Шонымем пандемий деч ончыч шукталте, кеч тидланже тау. Но сай дене пырля нелылыкат лие, кумылымат волтышт, улшо йӧнат кучылталтде кодо. Туге гынат тыршыме арам ыш лий.
Шушаш ийыште бизнесым у корно дене виктарен колташ шонем. Кузежым кызытеш ом ойло. Манмыла, шинча возын кертеш. Продукцийна тӱҥ шотышто тудак кодеш – нӧшмӧ ден пеледыш. Но умбакыже вияҥаш кӱлеш. Тидын деч посна ончыко каяш ок лий. Кеч-кӧат ончыкылык нерген шонышаш, ӱшан дене илышаш.
У ий саламлымашемат тидын денак кылдынем. Ӱшан тиде пычкемыш корнышто тул гаяк. Тудо лиеш – кеч-могай нелылыкым сеҥен лектат. Санденак ӱшан дене илыза! Тидым мый эн ончычак изи бизнесын представительже-влаклан ойлем. Кугу бизнесын, супермаркет-влакын, темден толмо жапыште нунылан тугакшат куштылго огыл. Чытен лекташ ӱшан гына полша. Пеҥгыде лийза! Адакше, йӧн дене пайдаланен, чылалан, тидын шотыштак ешем ден родо-тукымемлан, У ийыште тазалыкым да пиалым тыланем!
Е.В.Кашина,
«Елена» ООО-н директоржо
