Марий Эл Радион хит-парадше
Йолташ-влак, тендан полшымо дене кодшо арняште мурызо-шамыч коклаштышт тыгайрак «тошкалтышым» чоҥеныт.
- Зинаида Александрова – «Шыже шонымаш»
- Людмила Конакова – «Ӱшан»
- Кристина Краснова – «Тый улат»
- Эльвира Токташева – «Тый пӧлекле мылам»
- Юлия Ви – «Лочо»
- «Чоным почын мурена» проект – «Чӱктӧ мемнан мурым»
- Володя Матвеев – «Улат тый»
- Татьяна Галкина – «Ит колто кидем»
- Станислав Шакиров – «Мотор игече»
- Диана Ямбаршева – «Эн шыма тӱняште»
Йӧратыме мурызыланда ончыл верым налашыже кузе полшышашым огыда пале гын, ушештарена: 5533 кӱчык номерыш SMS-ым колтыман. Тӱҥалтыште МАРИ мутым возыман, вара, яра верым кодыде, мурын номержым шындыман. Муро лӱмым кавычкыш налман огыл. Йӱклымаш SMS-ПОРТАЛ-ыште кая.
Кристина Краснова – эстраде аланыште палыме мурызо-влак Эльвира ден Вадим Красновмытын ӱдырышт. Нунымак ончен, мураш да кушташ шӱмаҥын.
Кызыт тудо Чуваш кугыжаныш университетын медицине факультетыштыже тунемеш, терапевт лияш ямдылалтеш. Россий калык усталыкын сулло коллективше, «Марий памаш» фольклор да этнографий ансамбльыште кушта, мура. Сценыште солист семынат шукыштлан палыме.
«Тый улат»
Мутшо – Светлана Архипован,
Семже – Надежда Кульшетован.
Аранжировкым Станислав Устюгов ыштен.
Йӧратен нал мыйым кӱдынь,
Пеленет эре каем,
Шӱдыран волгалтше йӱдым
Лий эҥертыш, ӱшанем.
Кӱдыроҥгыр гае кумыл
Пеледеш лачак тылат,
Ир пораным, йӱштӧ лумым
Мый декем сеҥен толат.
Припев:
Йолгорнем вӱда
Воктекет гына.
Нимолан лӱдаш,
Вет тый — кеҥеж тӱня.
Тый улат, шÿлем,
Ныжыл, илышем.
Да кыра шÿмем,
Тыйым веле йӧратен.
Тый улат сай, сай,
Чонышто – лай-лай,
Ныжыл ӱмашкет наҥгай.
Мый дечем посна ит кай.
Кондет угыч сылне шошым,
Юзо вийым кучылтат,
Кажне корно, кажне ошкыл,
Тый декетше лишемдат.
Ойырен чонемже иктым,
Весе ок кÿл мыланем.
Кучо мыйын шокшо кидым,
Илыш корно куанем.
Алевтина БАЙКОВА ямдылен
Фотом еш альбом гыч налме
