Йошкар-Ола гыч марий ӱдыр, дизайнер Юлия Мамаева шке кидше дене ыштыме стилизоватлыме марий тувыр-влакым ВДНХ-ште эртыше «Россий» тӱнямбал ончерын Марий Элысе павильоныштыжо ончыктен.
Куэм гыч ургымо марий тӱран тувыр-влакым чиен войзалтше-шамычат шукын лийыныт. Тудын Пошкырт велысе марий тувыржымат мокталтыман. Ӱдырын аваже шочынжо — тудо вел гыч.
Тувыр сылнырак койжо манын, дизайнер тӱрлӧ сӧрастарышымат ышта. Ончерыште шке вургемже дене палдарыме деч посна тудо эше оксан лияш полшышо аралтыш сынан изи «окса мешакым» ыштыме мастер-классым эртарен. Ончылгоч ямдылыме 46 «мешакшым» пеш вашке налын пытареныт, воза ӱдыр шке соцкыл лаштыкыштыже.
Дизайнерын лаштыкшым ончен лектым да ӧрымат: тудо марий тӱрым рвезе-влакын спортивный сынан кофтышкышт, сумкашкышт тӱрлен келыштара. «Тӱрым тыглай илышыште чийыме чыла вургемыш вераҥдаш лиеш. Тыге тудо ойыртемалтше лиеш»,– манеш шкеже. Юлия Йошкар-Оласе технологический колледжым модельер-конструктор специальностьым налын, вара Озаҥысе калыкле шымлыше технологический университетын Куштылго промышленностьын технологийже, мода да дизайн институтыштыжо шинчымашым налын. Кызыт Озаҥ олаште ила да пашам ышта, шке мастерскойжым почын.
Светлана Носова
Снимкыште: Юлия Мамаева
Фотом Ю.Мамаеван еш альбомжо гыч налме
