Корно озанлык
Терген шогат, шотышто кучат
Марий Элысе федерал корнылаште телым кудалыштме условийым терген шогаш корнысо метеостанций-влак полшат.
«Волго-Вятскуправтодор» ФКУ подряд организаций-влак республикыштына телым федерал корным шотышто кучаш ямде улыт. Автокорно дене лӱдыкшӧ да кӱрылтыш деч посна кудалышташ лийже манын, 8,6 тӱжем тонн ошма ден шинчал вартышым да 5,8 тӱжем тонн яндар шинчалым ямдылыме. Нуным кучылтмаш игече условий, лум да ий лончо могай улмо дене кылдалтын. Температур мыняр изирак, ий деч тунар шукырак тыгай материал кучылталтеш. Корнышто локтылалтше верым писын тӧрлышашлан подряд организаций-влакын йӱштӧ асфальт-бетон шапашышт уло.
Телым корным шотышто кучышашлан 42 единице корно техникым ямдылыме, тидын шотыштак – 21 комбинироватлыме машинам, 5 автогрейдерым, шнекороторан 3 лумэрыктышым, грузитлыше 6 средствым, бульдозерым да оборудованийым вашталтыман 6 тракторым. Подряд организаций-влакын ошмам шапашлыме 3 базышт, яндар шинчалым аралыме 4 складышт, техникым шокшышто шогыктымо 4 верышт, водитель-влаклан канашышт да ырашышт 4 пӧлем улыт.
Республикыште федерал трассыласе обстановкым корнысо 10 метеостанций да 10 видеокомплекс терген шогат. Тидлан кӧра ФКУ ден подряд организаций-влакын диспетчерышт корным писын шотыш кондыктен кертыт. Чыла техникым ГЛОНАСС навигаций системе дене ушымаш нунын пашаштым эскерен шогаш полша.
Корнышто кудалыштшыла, неле ситуаций лийме годым Федерал корно агентствын «Волго-Вятскуправтодор» ФКУ-жын кече мучко ыштыше диспетчер службышкыжо 8(843) 273-54-08 телефон дене але утарыше службыш 11 номер дене йыҥгыртен кертыда.
Юрий ИСАКОВ ямдылен
Фотом «Волго-Вятскуправтодор» ФКУ деч налме
