Кугыжаныш Погынын бюджет да экономический политике комитетше сайлыше-шамычын 2027 ийлан наказыштым иктыш чумырен.
Тиде документыште кажне пашалан кокла шот дене мыняр окса кӱлмым ончыктымо.
Шушаш ийын чылаже 85 наказым шукташ палемдыме. Нуно школым, кудывечым да скверым тӱзатыме, илышлан кӱлешан объектлашке (йочасадыш, школыш, фельдшер-акушер пунктыш) корным олмыктымо, велопаркым ыштыме, контейнер площадкым шотыш кондымо, уремысе понарым уэмдыме, спорт да тазалыкым пеҥгыдемдыме площадкым чоҥымо, обелискым, верысе корным да шуко молым ачалыме дене кылдалтыныт.
Темлымаш-влак Кугыжаныш Погынын 50 депутатше деч пуреныт.
Финанс да экономике велым негызлыме документым 1 июнь марте Марий Элын правительствыжлан ончаш да иктешлымашым ышташ колташ пунчалме.
Маргарита ИВАНОВА.
