КУЛЬТУР ДА ИСКУССТВО ЭСТРАДЕ

«Тек ила тӱняште марий муро Муро ден моктем марий мландем»

9 мартыште Сеҥымашын XXX идалыкше лӱмеш тӱвыра полатыште Марий Эл радио «Идалыкысе муро» фестиваль дене 2021 ийысе пашажым иктешлен.

Тений тудо латикымше гана марий мурым йӧратыше-влакым ик верыш чумырен. Залыште пайрем концертым ончаш толшо-шамыч коклаште мурын авторжо ден семмастарже-влакат лийыныт.

2021 ийыште Марий Эл радион фондышкыжо 231 у муро пурен. Нунын кокла гыч эн сайыштым, колыштшо-влакын йӱклымышт почеш хит-парадыште ончыл верыш логалше муро-влакым, ты гана фестивальыште уэш темлышт. Сценыште ятыр ий дене эстраде аланыште палыме мурызо-влак коклаште самырык-влакат лийыныт. Тиде радамыште Надежда Крылова, Анастасия Топаева, Виктория Мочалова да Параньга район гыч «Мурпеледыш» ансамбль улыт.

Мыняр мурызо, тунар тӱрлӧ муро. Нуно шочмо кундем, йӧратымаш да лишыл еҥлан тауштымо сынан лийыныт.

Фестивальыште мурын авторжо ден семмастарже-влакынат пашаштым аклен, дипломым да статуэткым кучыктеныт. Мо оҥайже, Оршанке районысо Кугунур гыч  Елена Рыбакова ден  Римма Кудрявцеван лӱмышт сценыште ятыр гана йоҥгалтыч. А тидыже, мутат уке, идалык мучко кыртмен пашам ыштымыштым ончыкта. Самырык возгалыше Христина Александроват нунын деч пешыжак вараш огеш код.

Концерт программым радиовӱдышӧ-влак шкешт вӱденыт. Марина Почтенева ден Вера Горохова мадемуазельын (иктыже ушан, а весыже шкеж манмыжла, пылде-полдо койышанрак) рольжо дене пайрем программыш мыскара шӱлышым сайынак пуртышт.

Фестивальыште сеҥыше-влакымат палемдышт. «Вконтакте» соцсетьыште эртаралтше йӱклымаште Эльфис Гараев «Лек мылам марлан», а радио эфирысе йӱклымаш почеш Татьяна Кибаева «Кол» мурышт дене сеҥышыш лектыныт. Татьяна идалык мучко Марий Эл радион хит-парадыштыже эреак ончыл верыште лийын улмаш. Самырык мурызо-влак Иван Соловьёв ден Надежда Ильиналан «Онлайн йӱклымаш» номинацийыште сеҥышыш лекташ концерт жапыште зал калыкын йӱклымыжӧ полшен. Пырля йоҥгалтарыме«Чон шокшо» мурышт чынжымак чоныш логале. Гран-при Марий Элын калык артистше Светлана Осипова-Шослан («Йолташем кушто мыйын») логалын. Ты мурызо идалык жапыште радион фондшым куд муро да кок дуэт дене пойдарен.

Марий Эл радион полшымыж дене ме у мурым ик эн ончыч колына веле огыл, авторжо-влакымат пален налын кертына. Ончыкшымат марий муро кумылым нӧлташ да илышнам веселаракым ышташ полша:

«Тек йоҥга тӱняште марий муро,

Муро ден пашам ыштен илем.

Тек ила тӱняште марий муро

Муро ден моктем марий мландем.» («Чоным почын мурена» проектын репертуарже гыч, мутшо Лидия Иксанован, семже Артур Ефремовын).

А.БАЙКОВА.

В.Поликарповын фотожо.

 

Опубликовать в Одноклассники

Добавить комментарий