Марий Элыште у коронавирус инфекций деч прививкым ыштыме кампаний умбакыже шуйна.
Республикыштына COVID-19 дене кылдалтше сÿрет саемын. Таче кечылан Марий Турек, Медведево да Звенигово районласе рÿдö больницылаште, тыгак Волжск оласе рÿдö эмлымверыште да Козьмодемьянск район-влак кокласе больницыште у коронавирус инфекций дене черланыше пациент-шамычлан медицине полышым пуымо 170 койкым гына кодымо.
– Ковид дене черланыме чот иземын гынат, санэпидрежимын южо чаракшым кодаш логалеш, молан манаш гын ончыкыжым мо лиеш, мом вучыман – каласаш неле, – манеш тазалык аралтыш министрын алмаштышыже Юлиана Зейтулаева (снимкыште). – Южо элыште черланыме чотын угыч кугемаш тÿҥалмыжым шотыш налын, коронавирус инфекцийын у толкынжылан ямде лияш кÿлеш.
Илыш чер дечын вакцинацийын эн сайын полшымыжым пеҥгыдемдыш. Таче кечылан республикыштына 404 тÿжем утла еҥ COVID-19 деч прививкым ыштыктен. Тидыже пеҥгыде тÿшка иммунитетым ышташ сита. Сандене республикыште илыше калыкым вакцинацийым умбакыжат эрташ ÿжам, а икымше уколым ыштыктыме але черым чытен лекме деч вара пел ий эртен гын, – ревакцинацийым, молан манаш гын антитела жап эртыме семын шагалемеш.
Прививкым республикысе чыла поликлиникыште ыштыкташ лиеш. Йошкар-Оласе Сеҥымашын ХХХ идалыкше лÿмеш тÿвыра полатыште вакцинаций рÿдер 1 апрель гыч пашам ыштымым чарна.
У коронавирус инфекций дене йоча-влакат черланат, сандене прививкым ыштыктыше кугыеҥ шочшыжым COVID-19 деч мыняр-гынат арала. Но 12 ияш деч кугурак ийготан икшыве-шамыч шкеныштым лачшымак нунылан палемдалтше вакцине дене арален кертыт.
Марий Элыште калыкын диспансеризацийжым умбакыже эртарат, тыгодым у коронавирус инфекцийым чытен лекше-шамычын тазалыкыштым радамлынрак тергат. Таче, черын мыняр-гынат шыпланымыж пагытыште, шке тазалыкым тергыкташ да, кÿлешак гын, эмлалташ эн келшыше, эн йöнан жап.
М.ИВАНОВА
