27 сентябрь гыч 2 октябрь марте Марий Элыште начаррак ужшо йоча-инвалид-влак коклаште всероссийский кеҥеж спартакиаде лиеш. Тушто 7 гыч 17 ияш-влак вийыштым тергаш тӱҥалыт.
Мероприятий «Спорт – илышын нормыжо» федерал проект дене келшышын эртаралтеш. Тудо инвалид-влакымат физический культур да спортлан кумылаҥдыме, таза илыш-йӱлам кучымо амал дене эртаралтеш. Спартакиадын финалыштыже 500 участник вийжым терга. Таҥасымашлам 103 спорт судья, 250 волонтёр тергаш тӱҥалыт. Участник-шамыч иймаште, куштылго атлетикыште, мини-футболышто, шахмат да шашке дене модмаште, голболышто, дзюдошто вийыштым тергат.
Спартакиадым 28 сентябрьыште 10 шагатлан Йошкар-Оласе «Дружба» стадионышто торжественно почыт. А мероприятийым 1 октябрьыште 17 шагатлан «Марий Эл» ий полатыште петырат.
Ты спартакиадыште Марий Элын чапшым 31 еҥ арала.
Е.Эшкинина.
