Кугыжаныш Погынышто тӱвыра да йылме нерген Марий Элын законодательствыжым саемдыме шотышто пашаче группын черетан заседанийже лийын. Тудын пашашкыже Кугыжаныш Погын председатель Михаил Васютин ушнен.
Пашаче группын еҥже-влак икымше йодышым – Марий Эл Республикын Конституцийже кечым кугыжаныш пайрем семын палемдышаш нерген – каҥашеныт. Тыгай темлымашым калык коклаште сайлан шотлат манын палдареныт. Кугыжаныш Погын пеленысе Экспертно-консультативный совет, тыгак Российысе юрист-влакын ассоциацийыштын регионысо отделенийжат сай семын аклыме да радамлыме иктешлымашым ыштеныт. Келшен толшо законым приниматлышаш ваштареш кугу торешланымаш лийын огыл. Пашаче группо Кугыжаныш Погынын депутатше-влаклан законопроектым ончаш республиканский парламентлан колташ темлен.
Кокымшо йодыш Марий Эл Республикын Кугыжаныш гимнже нерген законопроектым каҥашымаш дене кылдалтын. Пашаче группын еҥже-влак Марий Эл вуйлатышын администрацийже, республикын Образований да науко министерствыже, Йылмым, литературым да историйым научно шымлыше В.М.Васильев лӱмеш марий институт деч пурышо замечаний ден темлымаш-влакым ончен лектыныт.
Кумшо йодыш кышкарыште тылеч ончычсо заседанийын протоколжын пунктшо-влакым илышыш пуртымо нерген уверым колыштыныт. Марий Элын Тӱвыра, савыктыш да калык-влакын пашашт шотышто министерстве палдарен: республикысе вич театрын репертуарыштыже марий йылме дене 64 спектакль уло, йоча ден самырык-влаклан постановко-влак шындалтыт. Регионын Образований да науко министерствыже школыш кайыдыме ийготан да изирак класслаште тунемше-шамычлан марий йылмым тунемаш ешартыш кок общеобразовательный программым ямдылыме нерген ойлен.
Заседанийын участникше-влак посна тӱткышым Марий Элын законодательствыжым тӱвыра да йылме шотышто саемдышашлан ойыреныт. Марий Эл вуйлатышын администрацийже, профильный министерстве-влак, Марий кугыжаныш университет, моло учрежденийла гыч пурышо темлымаш-влакым ончен лектыныт. Пашаче группын еҥже-влак федеральный нормо ден вес регион-влакын эн сай практикыштым шотыш налын, законопроект-влак дене пашам системно шукташ кӱлмӧ нерген ойленыт.
Заседанийым иктешлышыжла, Кугыжаныш Погын председательын икымше алмаштышыже, пашаче группын председательже Лариса Яковлева эртарыме пашан кӱлешлыкшым палемден.
– Ме тыште ик пашаче группын еҥышт улына да шонымашнат икте. Иктаж-мо дене огына келше гын, тыште мутланышаш улына. Паша умбакыже шуйнаш тӱҥалеш. Законопроектымкӱлеш семын ыштымешке, ме чарнен огына шогал, – каласен Лариса Яковлева.
Любовь Камалетдинова
