СЫЛНЫМУТ

«Сылне мут дене могай-гынат шижмашемым намен шуктынем»

Параньга районысо Олор ялын шочшыжо Надежда Никитинан (Гордееван) лӱмжӧ поэзий аланыште веле огыл, марий эстрадыштат моткоч палыме.

14 ияшыж годымак сылнымут корнылам возаш шӱмаҥше ӱдыр таче кече марте шуко серен. А икымше сылнымут произведенийжылан «Шыже» почеламутым шотла.

Н.Никитина кум сборникын («Пӱрымаш пӧлек» (1994), «Пеленет улам да» (2008), «Олык мучко – изи кече» (2014)) авторжо.

Тудын возымо почеламутшо-влаклан марий композитор-влакат семым пышташ кумылан улыт.

– Чылаже мыняр муро возалтмым рашыже каласенат ом керт, коло-коло визытыш погына, очыни, – чонжым почеш Надежда. – Тӱҥ шотышто Марий Элын калык артистше Станислав Шакиров дене ятыр мурым ямдылыме, тыгак мурызо Татьяна Умурбаевалан да эше икмыняр еҥлан возалтыныт.  Почеламутем-влаклан возымо мурым колмеке, кумылем нӧлталтеш, поснак икымше гана йоҥгалтмыже чоным тарвата. Адакшым мурылык поэзий шкешотан. Тудын шке ойыртемже уло. Возымо правилжат вестӱрлырак.

Поэтессылан могай теме лишылрак? Тидын шотышто Надежда Никитина тыгерак каласыш:

– Серыме паша – чон йодмо кумыл. Посна темым ойырен каласен ом керт. Кеч-мо гынат, мый лудшо але колыштшо еҥын чонышкыжо сылне мут дене могай- гынат шижмашемым намиен шуктынем.

А.БАЙКОВА

Фотом еш альбомжо гыч налме

Опубликовать в Одноклассники

Добавить комментарий