Тачысе номерыште шке рецептше-влак дене тендам Елена Нестеренко (снимкыште) палдара. Тудо Волжский районысо Усола Корамас ялыште кушкын, а вараже илыш корныжо тора Италийыш наҥгаен. Туштак шӱм пелашыжым вашлийын да ешым чоҥен. Тиде чолга ӱдырамаш нерген радамлынрак вес арнян «Марий Эл» газетыште пален налын кертыда.
А кызытеш ик кочкышым ямдылыме рецептыштым темлена. Чыным каласаш гын, тудо кокыт дене палдарен. Сандене весыжым вес номерыште савыктена. Вучыза.
Секретым почам: кок когыльжымат ме Елена Александровна деке унала мийыме годым мӧҥгыштыжӧ пырля ямдыленна. Ну, такшым кузе пырля: тунемме семын, тидым-тудым ышташ полшаш тыршенам…
Икымшыже – «Шарлотка» гай, но эшеат тамлырак. Ыштен ончыза.
Весымат пален налашда оҥай лиеш, очыни: Италийыште илымыж жапыште могай кочкыш рецепт келшен, могайым колын але телевизор дене ужын – тудо чылажымат кӱжгӧ книга гай дневник-тетрадьыш возен. Ончыктыш гын, мо тушто уке?!
– Кочкышым ямдылаш туныктымо передачым Италийыште ик канал дене лач кечывалым ончыктат. А мыйын тиде жапыште ончымо кочайым пукшаш кӱлеш. Сандене тыгай годым ик кид дене тудым совла дене пукшем, весыж дене тетрадьыш рецептым возаш тыршем. Ойлымо почеш серен шукташ манын, ик мутшым марла, весыжым рушла, кумшыжым итальянла возем! – шыргыж каласкала озавате.
А вара палдарыш:
– Таче ямдылен ончаш темлыме рецептым «Алёнан когыльыжо» манын лӱмденам. Италийыште Алёна лӱман молдаван йолташ ватем уло. Ончыч тудын дене канышым чӱчкыдынак пырля эртаренна, теҥыз деке пырля коштынна. Арня мучко итальян кочкышым кочкын илет да кеч каныш годым шкенан руш кухньысо сийым кочмо шуэш. Сандене южгунамже тудын айлен илыме пачерыштыже мелнам кӱэштына, шӱрым шолтена ыле. Икана ойла: «Айда мый тыйым тыште итальянец-шамыч «Шарлоткым» кузе ыштат, тудым кӱэшташ туныктем». Мый, мутат уке, куанен кӧнышым! А ынде тудым «Сурт-пече» газетым лудшо-влаклан темлынем.
«Алёнан когыльыжо»
Кӱлеш :
- 2 муно,
- 200 г сакырложаш,
- 100 мл нӧшмӱй,
- 200 мл шӧр,
- пел изи пакет ру (быстрорастворимый),
- тынарак разрыхлитель,
- тынарак ванилин,
- ик чывыштыш наре тыгыдемдыме шоколад (огыда пыште гынат лиеш, но тыге тамлырак),
- 3 олма.
Тыге ямдылена:
- кок муным сакырложаш дене пырля лугена;
- тушко рум, разрыхлительым, ванилиным пыштена, шӧрым темена да лугена;
- ынде нӧшмӱйым ешарена да адакат сайын лугена. Руаш нугыдо ӱмбал гайрак лийшаш;
- тылеч вара олмам мушкына, шӱмжым, кӧргыжым эрыктена да вичкыж долько-влаклан пӱчкедена;
- салмашке ушкал ӱйым йыгена, ямде когыльым тӧргалтен налаш куштылгырак лийже манын, панироватлаш кучылтмо йоҥыштымо сукарам шавалтена да руашым опталына;
- ӱмбакше пеледышла але могай узор келша, туге олмам оптена. Но нуным шӧрын шындылман. Тура шындет гын, волен каят;
- тудым 180 градусым чӱктымӧ духовкыш 25-30 минутлан шындена;
- ямде олма когыльо ӱмбаке сакыр пудрым шавалтена.
Перкан лийже!»
