УВЕР ЙОГЫН

«Сурт-печын» коҥга ончылныжо

Кодшо номерыште ик рецептше дене тендам Елена Нестеренко (снимкыште) палдарыш. Тунамак возенна ыле: озавате такшым кок рецептым пуэн, сандене весыжым вес номерыште савыктена.

Сӧрымынам шуктена да таче «Кростата» почмо когыльым  кӱэташ туныктена. Тудымат ме Елена Александровна деке унала мийыме годым мӧҥгыштыжӧ пырля ямдыленна.

Итальян йылме гыч кусараш гын, «кростата» лач тыгак манмым ончыкта: почмо когыльо. Тудым песочный манме руаш гыч кӱэштман. А ӱмбакше шараш кеч-могай вареньым – чонланда але унада-влаклан могай келша манын шонеда, тугайым – кучылт кертыда, – рашемдыш озавате.

Тыгай сынан когыльым кызыт такше кугурак кевытлаште налаш лиеш. Кӧлан кузе, но ала ик жап уна-шамыч тудым чӱчкыдын налын пуртат да кочкын шер темаш тӱҥалын, ала вес амал дене – йӧршынак йӧратымым чарненам ыле. А Елена Александровна дене ямдылышна гын, моткочак тамлын чучо! Очыни, шке да чот тыршен, уло кумыл дене ыштенна да сандене…

 

«Кростата»

Кӱлеш :

  • 200 г ложаш,
  • 2 муно,
  • 150 г ушкал ӱй,
  • 150 г сакырложаш,
  • ик лимонын шӱмжӧ,
  • пел изи пакет ру (быстрорастворимый),
  • варене (кӱлмӧ семын).

 

Тыге ямдылена:

  • чыла ингридиентым ик атыш пыштена, лугена да нӧштылына;
  • тылеч вара ямде пеҥгыде руашым кок ужашлан шелына: иктыже кугурак, весыже изирак лийшаш;
  • ынде нуным пакет кӧргыш пыштена але атыштак левед шындена да пел шагат наре кандарена – тыге шарыме годым тудо кушкедлаш огеш тӱҥал;
  • пел шагат гыч кугурак ужашыжым шарена да салма пундашыш йыргешкын пӱчкын пыштыме пергамент кагаз ӱмбаке тудым вераҥдена;
  • ӱмбакше вареньым пыштена, йоген кайыме деч шекланен, тӱр марте чаткан шарена;
  • кодшо изи ужаш руашым шарена, корно (полоско)-влаклан пӱчкедена да, сӧрастараш, варене ӱмбаке моторын оптена (снимкыште ончыктымо семын);
  • тудым 180 градусым чӱктымӧ духовкышто 35-40 минут кӱктена;

 

Темлыме семын: руашда утен кодеш гын, ида ӧр. Тудын гыч тамле печеньым кӱэшт кертыда!

Ме тыгак ыштенна ыле. Чыным каласаш гын, руашнаже теве молан утен кодын: рецептыште 300 грамм ложашым налаш каласыме да ме тынарак пыштенна. Но, озаватын ойлымыж почеш, Италийысе да мемнан элысе ложаш ойыртемалтыт (такшым тамыштат вестӱрлӧ мане – авт.). Тыге,  когыльым ыштен пыштымеке, руаш утен кодо. Тиде амал дене озаватын темлымыж почеш рецептышкат вашталтышым пуртышна: 300 грамм олмеш 200 грамм ложашым пышташ кӱлеш манын палемдышна (кӱшнӧ ончалза – авт.)

Руаш утен кодмылан мемнан кумылна гын йӧршынат волен огыл ыле, вет ик сий олмеш, кок тӱрльым кочкаш йӧн лекте! Сандене те, мутлан, ложашым лӱмынак шукырак пыштен да печеньым ыштен кертыдас! Шотыш налза…

Опубликовать в Одноклассники

Добавить комментарий