Кодшо номерыште сӧрымӧ почеш, тачысе «Озавате» мужыр лаштыкыштат У Торъял район Кузнеч ял гыч Александра Григорьевна Ермакован эше ик кочкыш рецептшым темлена. Арня ончыч ойленна ыле вет: тудын кажне гаяк кочкышым ямдылымаштыже могай-гынат ойыртемалтше секретше уло! Сандене ты ганат тидым моткочак пален налме шуэш, туге?
Тыге таче ме шӱрашан мелнам ямдылаш тӱҥалына. Молан манаш гын, Кугечылан шукынжо тудым ыштат, очыни. А, вес велым, тыгай мелна моткочак тамле!
Шӱрашан мелна
«Мелналан руашым мый кастенак луген шындем, – палдарыш уста озавате. Да ойжым умбакыже шуйыш:
– Мелна руашым ышташ теве мо кӱлеш:
- 3 л тувыртышвӱд,
- 500 г манный шӱраш,
- 1 кӱчымӧ пареҥге,
- 50 г ош арака,
- 1-2 муно,
- 20-30 г ру,
- 1 кг «Блинный» ложаш,
- пел изи совла шинчал.
Руашым тыге ямдылем:
- кум литр тувыртышвӱдыш пел кило наре манный шӱрашым пыштем. Тудо эр марте шинча;
- эрлашыжым тушко ик кӱчымӧ пареҥгым нӱжен пыштем;
- вара тышкак рум, шинчалым, муным, ош аракам, ложашым ешарем да сайын лугем;
- икмыняр жап гыч, оваргымекше, мелнам коҥгаште кӱэшташ тӱҥалам.
А тылеч ончыч мелнавалым шолтем.
Тидлан теве мо кӱлеш:
- 3 стакан шӧр,
- 1 стакан шӱраш (мый кукурузный, шож але «Полтавский» шӱрашым кучылтам),
- 1 кугу совла наре шинчал.
Тудым тыге ямдылем:
- шӧрым тул ӱмбаке шындем;
- шолаш пурымекше, шокшырак вӱд дене мушмо шӱрашым, шинчалым пыштем;
- шӧр ден шӱрашын шолаш пурымекышт, тулым вигак йӧртем;
- йӱкшымекше, тушко кум муным, 1 кугу совла майонезым ешарем.
Ынде тудым коҥгаште кӱэшт лукмо деч вара вигак кажне мелна ӱмбаке шарем да кӱмешкыже, чевергымешкыже уэш коҥгаште кӱктен луктам.
Перкан лийже!
Мыйын ешемат утларакше тыгай мелнам йӧрата да кажне пайремланак ышташ тыршем.
Марий мелна руашыш ош аракам пыштыме нерген икымше гана кольым да шкешотан тыгай секрет чотак ӧрыктарыш. Сандене молан тудым ешарымым озавате деч умылтараш йодым.
– Ош арака руашым оварташ полша да пушкыдыракым ышта. Тыгай секретым мылам ик руш ӱдырамаш ойлен. Икана тудын дене уна лийынам да кӱэштме когыльыжым пукшен. А тудыжо моткочак пушкыдо лийын! «Когылетше пешак пушкыдыс. Кузе тыгайым ыштет?» – йодынам. Тунам палымем руашыш аракам ешарымыж нерген каласыш. Тулеч вара мыят тыгак ышташ тӱҥальым. А такшым вет тортыш, южо моло лачка кочкышышкат аракам пыштатыс.
– Кызыт тендан велне шукынжо мелна руашыш ынде аракам пыштат, очыни? – йодым.
– Уке, – лие вашмут. – Мыяк веле тыге ыштем, вет але марте тиде секретем нигӧланат ойлен омыл ыле.
Тыгай вашмутым колын, йӧндымынат чучын колтыш.
– Ну во-от, ынде чылан пален налытыс! – шуйдаренак маньым.
– Мо, йӧра, тек пален налыт. Такше шукын пушкыдо мелнам кӱэштыт да кажныжын гаяк шке секретше. Южышт, мутлан, ӱйым шукырак пыштат, а мый тевыс тыге ыштем, – ласкан иктешлыш Александра Григорьевна.
Любовь Камалетдинова
