Марий Элын Ялозанлык да продовольствий министерствыжын палдарымыж почеш, 11 майлан республик мучко 128525 гектар мландым ӱдаш ямдылыме. Эн шуко (25589 га) – Марий Турек районышто. Кокымшо верыште – Шернур район (15654 га). Кумшышто – Медведево район – 13096 гектар.
Икияш культурым 155476 гектарыште ӱдаш палемдыме. Теҥгечылан 119667 гектарыште ты пашам шуктымо. Тидыже 77 % лиеш. Районлам ончалаш гын, эн сайын У Торъял ден Медведево кундемлаште тыршеныт. Тушто 90 % показательыш шуыныт. Кокымшо верыште Оршанке ден Шернур районла улыт. Тушто 89 %-ыште паша ышталтын. Кумшо верыште (85 %) – Марий Турек район.
Икияш пырчан да пурсан культурым тений республик мучко 104151 гектарыште ӱдаш палемдалтеш. 11 майлан нуным 89275 гектар кумдыкыш ӱдымӧ. Тидыже 86 % лиеш.
Южо районышто, рашрак каласаш гын, Курыкмарий, Медведево да Волжский кундемлаште, пареҥгымат шынденыт. Мутлан, Курыкмарий районышто чылаже 2525 гектарыште ты пашам шуктышаш улыт гын, изарнялан 870 гектарым авалтеныт. Медведево районышто палемдыме 73,5 га гыч 20 гектар кумдыкыш шынденыт. Юлсер кундемыште план почеш 29 гектарыште ты пашам шуктышаш улыт гын, 11 майлан 13 гектарыш шынденыт.
Л.Камалетдинова
