Республикыштына кумдыкым комплексно вияҥдыме (КРТ) 8 проект шукталт толеш, чылаже 125 квадратный метр илыме вер чоҥалтеш.
Марий Эл вуйлатыше Юрий Зайцев нине да КРТ-н моло проектше нерген «ДОМ.РФ» АО-н генеральный директоржо Виталий Мутко дене Петербургысо тӱнямбал экономический форумышто мутланен.
Республикыште кумдыкым комплексно вияҥдыме проект-влак инфраструктуран илыме верым чоҥаш полшат, илыме пӧрт дене иквереш школ да йочасад-влак нӧлталтыт. Ты пашашке госкомпаният ушна. Тачысе кечылан 8 ойпидышым пеҥгыдемдыме да нуно шукталтыт. «ДОМ.РФ» АО Мышино районышто эше 3 кумдыкым темла. Тудын концепцийже почеш, тыште 560 тӱжем кв. метр кумдыкышто шуко пачашан илыме вер, 4 школ да 7 йочасад чоҥалтшаш.
Кызыт щукталтше да ончыкылыклан палемдыме проект-влакым иктеш ушаш да стратегический планированийым оптимизироватлаш мастер-план полша. «Йошкар-Ола» ола округын агломерацийжын мастер-планжым радамлен ямдылыме паша «ДОМ.РФ» АО-н да Дом.РФ Фондын 2023-2024 ийлан палемдыме финансовый планышкышт пурталт кертеш манме ӱшан уло.
Марий Эл вуйлатыше палемден, республик правительствын «ДОМ.РФ» АО дене пашам пырля ыштымыже пайдалыкшым ончыктен: Йошкар-Ола да Медведево район кажне кечын весемеш.
«Вашлиймаш годым Йошкар-Олан чоҥымо мастер-планым каҥашымылан моткоч кугу тау. Мемнан задачына – олам да район-влакым комплексно вияҥдаш, еҥ-влакын чыла шотыштат йӧнан илыме верышт лийже, воктенак йочасад, школ, поликлинике, кевыт-влак, тӱзатыме кумдыкла верланышт. Ме рӱдолана лишыл жапыште могайым ужаш шонымынам палемдышна. Вашлиймаш дене пайдаланен, Тендам Марий Элыш ӱжам. Унам вашлийын моштышо марий мландыштына вучаш тӱҥалына», – каласен Юрий Зайцев.
Регион ден инвестор-влак кумдыкым комплексно вияҥдымашым кумдан кучылтыт, палемден «ДОМ.РФ» АО-н директоржо. «ДОМ.РФ фонд 17 регионышто 2,6 миллион квадрат метр илыме верым чоҥымо шотышто 20 утла КРТ ойпидышым пенгыдемден», – рашемден ойлен Виталий Мутко.
Марий Эл Республикым вуйлатышын информаций паша пӧлкажын
уверже негызеш Л.СЕМЕНОВА ямдылен
Д.Речкинын фотожо
