Омскышто 35-ше гана Сибирьысе тӱнямбал кӱкшытан марафон лийын, тудын кышкарыштыжак Российын кубокшылан таҥасымаш эртен. Марий Эл гыч Людмила Лебедева Российын кубокшым сеҥен налын да марафонын ший призёржо семын палемдалтын.
Оласе Соборный площадь ты кечын Российын 50 регионжо, тунясе лу эл гыч куштылго атлетикым йӧратыше 5517 еҥым иквереш чумырен. Участник-влак кум дистанций – 3, 10 да 42,195 километр – гыч иктыштыже таҥасеныт. 42,195 километр кужытаныштыже вийым чылаже 377 атлет терген ончен. Нунын коклаште мемнан Людмила Лебедева таҥасен. Личный рекорд почеш тудо нылымше позицийыште лийын. Туге гынат кокымшо верым сенен налын да ший медаль дене палемдалтын. Тиде результат спортсменкылан Российын кубокшым налаш йӧным ыштен, молан манаш гын икымше верым налше кубокын зачётыштыжо вийжым терген огыл.
Г.Кожевникова
Фотом Марий Эл Спорт да туризм министерствын сайтше гыч налме
