7 июньышто Марий Эл Перинатальный рӱдерын кӱкшӧ технологиян у корпусыштыжо шочшо икымше кум йочам мӧҥгышкышт колтеныт.
У зданийыште ош тӱняш толшо икымше аза – Йошкар-Олаште илыше Анастасия ден Роман Коржовмытын Артем эргышт. Йоча 2 июньышто шочын. Тудын кок ияш Матвей изаже уло.
Кокымшо ӱдыр азам Морко район гыч Татьяна Филиппова 3 июньышто ыштен. Тиде ньоганат 2 ияш Илья изаже уло. Ковашт, Галина Алексеевна, ӱдыр уныкан лиймыжлан моткоч куанен.
Кӱкшӧ технологиян у корпусышто шочшо кумшо азалан, Йошкар-Ола гыч Юлия ден Владимир Домрачевмытын эрге йочаштлан, лӱмым эше кычал мумо огыл. Тиде кугу сомылым шке ӱмбакше у айдемын 15 ияш Евгения акаже налын.
Пиалан ача-ава-влакым регионын тазалык аралтыш министржын алмаштышыже Татьяна Бастракова шокшын саламлен.
– Кужун вучымо тиде кече аза-влакын ача-авашт ден лишыл еҥыштлан веле огыл, рӱдерын пашаеҥже-шамычланат моткоч куанле. Медик-влаклан пашам, ава-шамычлан азам ышташ, йоча-влаклан ош тӱняшке толаш йӧнан тиде у корпусым кок ий вученна! Тиде пӧрт гыч лектын кайыше чыла еҥлан сайым гына тыланена. Рӱдер нерген йолташда ден палымыда-шамычлан каласкалыза. Пӧртылза эше – чыладам вучена! – у зданийыште шочшо икымше ньога-влак дене чеверласымыж годым манын Перинатальный рӱдерын тӱҥ врачше Ирина Виноградова.
М.ИВАНОВА
Фотом интернет гыч налме
