Таче шемпызлыгичкым кажне гаяк сад-пакчаште ужаш лиеш. Тудо мотор веле огыл, эше пайдале – саскаже поливитамин комплексым алмаштен кертеш. Тылеч посна тушто организм гыч токсиным лукшо, кочкышым шулыктарыме пашам саемдыше, аппетитым шотыш кондышо вещества уло. Шемпызлыгичке тыгак иммунитетым пеҥгыдемда да организмыште пуалме дене кылдалтше тӱрлӧ черым чактара.
Иммунитетым пеҥгыдемдышашлан 3 кугу совла коштымо саскашке 0,5 л шолшо вӱдым темыман, йоҥгытым петырыман да 30 минут шинчыктыман. Ямде настойым кечеш 3 гана кочмо деч пел шагат ончыч йӱман.
Шӱм-вӱргорно да пагар-шолыгорно дене кылдалтше тӱрлӧ чер деч тыгай йӧн полша: 1 кг свежа да сайын мушмо саскаш 700 г сакырложаш ден 10 г лимон кислотам ешарыман. Вартышым туржман да сайын йӧрыман, суткаште, вӱдым але чайым подылын, 100 г дене кочман.
Гипертоний деч 50 мл шемпызлыгичке сокым 1 кугу совла мӱй дене йӧрыман. Вартышым кечеш 3 гана кочмо деч пел шагат ончыч йӱман. Тиде йӧн дене 1,5 тылзе эмлалтман.
Пызлыгичке эмлыше вийже дене шергакан. Тыгодым айдеме организмлан шемыжат, йошкаргыжат ик семын пайдале, ойыртем тамыште гына – икымшыже тутлырак.
Мокш да верге чер, сакыр диабет тургыжландарыме, кылмен черланыме годым кок тӱрлӧ пызлыгичкыж денат эмлалташ лиеш. Тиде саска тыгак холецистит, вуйдорыкысо вӱргорнын склерозшо, геморрой да анемий деч сайын полша.
Пызлыгичкыште йод шуко, сандене тудо щитовидный ту дене кылдалтше чыла гаяк чер деч пайдале.
Темлыме йӧн дене эмлалтме годым тидымат шотыш налман: пызлыгичке пагар сокын шопылыкшым кугемда, сандене йора але гастрит, тыгак мел шелме годым тудын дене пайдаланаш чаралтеш.
Пызлыгичке вӱрым нугыдемда, сандене тромбофлебит але ишемий тургыжландарыме годым тудын дене эмлалташ лӱдыкшӧ.
А эше пызлыгичке аллергийлан вияҥаш амалым ыштен кертеш. Тыгак южо еҥ тудым просто чытен огеш керт.
Пызлыгичкым кулинарийыште кумдан кучылтыт, тудын дене кышалым ямдылат, чайымат шолтат. Тидланже 1 кугу совла коштымо саскаш 0,2-1 л вӱдым темат, вартышым изи тул ӱмбалне 2-4 минут шолтат, 1 шагат шинчыктат да шӱрат. Отварым кече мучко йӱыт.
Чайым моло компонент денат шолташ лиеш. Мутлан, икнаре налме йошкар да шемпызлыгичке, шуанвондыгичке вартыш дене. Рецептше тудак. Але кугыт шот дене икнаре налме пызлыгичке да висвис вартыш дене.
А эше настойкым ямдылаш лиеш. Тидланже 50 г коштымо пызлыгичкыш 0,5 л ош аракам темыман, вартышым пычкемыш верыште 3 арня шинчыктыман, вара шӱрыман.
Ямде средствым кечеш 2-3 гана 1 изи совла дене шуженеш подылман. Тылеч вара 20-30 минут гыч веле кочман. Тиде йӧн дене 3 арня эмлалтман, вара 1 арня каналтыман да эше ик курсым эртыман.
М.ИВАНОВА ямдылен
М.Иванован фотожо/ «Марий Эл» увер агентстве
