Регионысо Образований да науко министерствыште ача-ава контроль шотышто республикысе мер штабын заседанийже лийын.
Погынышо-влак тений республикыште «Образованийын школ систымыжым уэмден вияҥдымаш» федерал программым илышыш пуртымо дене кылдалтше чыла гаяк йодышым каҥашеныт: школым капитально олмыктымо, туныктышо-влакын квалификацийыштым нӧлтымӧ, тунемаш да туныкташ средства, тунемме книгудо фондым ыштыме.
Заседанийыш видео-конференц-кыл йӧн дене ача-ава мер контрольын муниципальный штабшын еҥже-шамыч Медведево, Шернур, Параньга районла гыч ушненыт.
Республикысе штабым вуйлатыше Мария Шавкунован мутшо почеш, ача-ава-влакым палемдыме программым илышыш пуртымо пашаш ушнаш кумылаҥдаш моткоч кӱлеш, пырля сай лектышыш шуаш йӧн уло.
Г.Кожевникова
