21-22 апрельыште Йошкар-Олаште Калык-влакын келшымаш пӧртыштышт «RT-Регион» медиашкол журналист, пресс-секретарь, блогер, преподаватель, студент-влаклан мастер-классым эртарен.
Школым почмо годым Марий Эл правительстве председательын алмаштышыже – тӱвыра, савыктыш да калык-влакын пашашт шотышто министр Константин Иванов республикыште СМИ-лан кугу верым ойырымо, Бауман лицейыште медиаклассым почмо нерген каласен да медиашколышто шуко кӱлешан да пайдале шинчымашым налаш тыланен.
Медиашколын вӱдышӧ специалистше-влак шуко оҥайым каласкаленыт, пайдале каҥаш дене пайлалтыныт. Мутлан, телевиденийыште да соцкыллаште видеоконтентын вияҥ толмыжо, тыгак шояк информацийым тергыме да тудын чын але уке улмыжым кузе пален налме дене палдареныт.
Мастер-класс ден тренинг-влак медиасообществын профессионал кӱкшытыштым нӧлташ виктаралтыныт. Тушто текст дене пашам ыштыме нерген веле огыл каласкаленыт, аудиторийым сайынрак умылаш, нунын дене пайдалын мутланыме нерген каласкаленыт. Тылеч посна ты мероприятий коллеге-влак дене опытым вашталташ йӧным пуэн.
«RT-Регион» медиашкол Российын икмыняр олаштыже тыгай мастер-классым эртарен. Йошкар-Ола 34-ше лийын. Ты школын занятийже-влак эше 18-19 апрельыште лийыт.
Снимкыште: Спикер Олег Дмитриев мастер-классым эртара.
Михаил Скобелевын фотожо
