«Энсай» марий сувенир салонын еҥже-влак марий вургемым тӱнямбал кӱкшытыштӧ ончыктеныт.
Российысе художество академийын тоштер-ончер комплексыштыже Зураб Церителин сымыктыш галерейжын посна залыштыже «Мода. Национальное Достояние» фестивальын финалже да гала-показше эртеныт. Мероприятий Российысе калык-влакын икоян улмо идалыклан пӧлеклалтын. Элнан ятыр регионжо ден олаже, тыгак Беларуссий, Казахстан, Кыргызстан, ОАЭ, Марокко да Индий гыч уста модельер-влак миеныт да шке ыштыш-кучышыштым ончыктеныт.
Марий Элын чапшым «Энсай» салон гыч Марина ден Александр Степановмыт араленыт. Нуно Москваш марий калыкын этнографий вургемже да вуйчиемже дене пырля кызытсе жаплан чияш келыштарыме марий орнаментан свитшот ден худим намиеныт. Модель-влак чылаже индеш костюмым ончыктеныт: кажныже ойыртемалтше. Этнографий костюмым эсогыл шурка дене пойдареныт.
Марий мастар-влакын коллекцийышт «Зов предков» премий дене палемдалтын.
Александрын палемдымыж почеш, тыгай мероприятийыште лияш да марий калыкын вургемжым ончыкташ йӧн пуалтме моткоч куанле да пайдале лийын: у шонымашым илышыш шыҥдараш кумыл лектын.
Светлана Носова.
Снимкыште: Александр Степанов.
Степановмытын еш альбомышт гыч налме фото.




