Май мучаште Йошкар-Оласе «Синема Эл» кинотеатрыште «Марийские сказки» киноальманахын премьерже эртен.
Регионысо кинематографист-влакын войзымо тичмаш метражан тиде фильм шукерте огыл РФ Тӱвыра министерствын прокатлан удостоверенийжым налын. Режиссёр Денис Шаблийын ӱжмыж почеш, фильмым икымше гана ончыктымашке тудын киноштыжо модшо руш актер Никита Паршин толын. Премьер годым музыкальный номер, съемко площадке гыч реквизит-влакым ончыктеныт. Артист-влак дене войзалаташ, мутым вашталташ йӧн лийын.
Фильмын сюжетше тыгайрак. Школыш у туныктышо толын. Урокын темыже олмеш тудо тунемше-влаклан кум историйым каласкала. Тиде марий талешке-влак Онар, Ирга да Чоткар нерген кызытсе жаплан келшыше историй-влак.
30 май гыч фильмым «Синема Эл», «Октябрь» да республикысе районласе чыла кинотеатрыште ончыкташ тӱҥалыт. Эн ончыч Кужэҥер, Шернур, Марий Турек, Оршанке, У Торъял, Килемар районлаште вашлиймаш-влак эртеныт. Лишыл кечылаште Курыкмарий, Волжский, Звенигово районлаште фильмым ужаш да съемочный тӱшка, режиссер дене вашлияш йӧн лиеш. Ушештарен кодыман, фильмыш Пушкин карт денат логалаш лиеш.
Светлана Носова.
Снимкыште: Йошкар-Олаште эртыше премьер годым.
Фотом Денис Шаблийын воткыл аштыкше гыч налме.
