«Народный фронт «Все для победы!» (pobeda.onf.ru) федеральный проектын сайтыштыже Марий Эл Республик гыч мобилизоватлыме граждан-влаклан полшымо шот дене лӱмынак QR-кодым ыштыме.
«Погымо окса шокшо вургемым, обмундированийым, медикаментым да илышлан кӱлешан моло материалым налаш да палемдыме вер марте намиен пуаш кучылталтеш. Кугу проектыш ушнаш манын, сайтыште QR-кодым сканироватлыман да поро пашалан окса надырым колтыман», – каласкала Марий Элысе Калык фронтын исполкомжым вуйлатыше Надежда Ефремова.
Гуманитарный полышым Марий Элысе Калык фронтын регионысо пӧлкаштыжат погат. Адресше: Йошкар-Ола, Ленин проспект, 29-ше №-ан пӧрт (Профобъединений ушем велым пурыман), 50-ше кабинет. Телефон: 8 (8362) 45-51-70.
М.ИВАНОВА
