Эртыше кечылаште Президентын тӱвыра инициативе фондшым ыштымылан 4 ий темын.
Марий Элыште проект офисше Калык тӱвыра пӧртыштӧ 2023 ий 3 ноябрьыште почылтын. Тидын лӱмеш ты кечылаште «Мечтатели! Проект на победу» лабораторий эртаралтын.
Йошкар-Олаште почылтшо проект офис Российыште – визымше. Тачысе кечылан тыгайже эл мучко 24 уло.
Погынышо-влакым Марий Элын тӱвыра, савыктыш да калык-влакын пашашт шотышто министрын алмаштышыже Николай Любимов, проект офис вуйлатыше Эльвира Куклина саламленыт.
Варажым лабораторийын участникше-влакым ты фондын пытартыш жапысе пашаже, тудын гоч могай темлымашым илышыш шыҥдараш лийме йӧн-влак дене палдареныт. Марий Элыште фондын полшымыж дене грантым сеҥен налше проект-влакын икмыняр авторышт дене вашмутланымаш, мастер-класс пайдале лийыныт.
Тӱвыра инициативе фондын кызыт увертарыме конкурсшо лишыл жапыште иктешлалтшаш, ты гана грантым сеҥен налше-влакым увертарышаш улыт.
Снимкыште: лабораторийым почмо годым.
Светлана Носован фотожо.
