Поэт, журналист Аркадий Букетов-Сайнын шочмыжлан тений 6 январьыште 90 ий темын. Тидын лӱмеш «Гармония» усталык ушем да «Югорно» мер ушем шарнымаш касым эртареныт. Пайрем нерген сылнымутчын ӱдыржӧ Ираида Букетова-Алвий каласкала:
– Тиште кече годым мурызо Геннадий Григорьев мыйым «Мунло» конкурсыш ӱжӧ. «Югорно» командыштына куд еҥ лийынна. Пырля шинчыме годым мутым луктым: «Аркадий Букетов-Сайнлан вашке 90 ий шуэш».
– Кунам шочмо кечыже?– йодо поэт, бард-мурызо, «Югорно» ушемым вуйлатыше Константин Шемякин.
– Кудымшо январьыште, Рошто вашеш.
– Ираида Аркадьевна, 15 январьыште юбилейым эртараш шонымаш лекте, – темлымашым ыштыш.
Кутырен келшышна. Мурызо-влак Геннадий Куклин ден Генадий Григорьеват полшаш келшышт. Мый пеш куанышым.
Ик ий ончыч Константин Шемякин ачамын возымо «Порылык» почеламутшым соцсетьысе лаштыкыштем ужын. Кок йылме дене вераҥденам ыле. Лудын лекмекше, мыланем сералтен: «Пеш келшыш. Мурым возем гын, тореш огыда лий?» Мый кӧнышым. Вес кечынак мурыжым колышташ колтыш.
Шарнымаш кас деч ик кече ончыч руш поэтессе Анна Бовт йыҥгыртыш.
– Те мыланем кок ий ончыч ачадан почеламут аршашыжым колтенда ыле. Кудытшым марла гыч рушлаш кусарышым. Кок почеламутшо мурылан келшыше.
15 январь шуо. 17 шагатлан оласе кафешке погынышна. Константин Шемякин шарнымаш касым почо, «Йога эҥер» мурым марий да руш йылме дене муралтыш, вара мыланем мутым пуыш. Анна Бовт ачамын, Аркадий Букетовын, поэзийже нерген пеш поро мутым каласкалыш, Морко районеш шочын-кушшо руш рвезе Саша Сычевым почеламутым чын возаш туныктымыжым шарналтыш, мыйын статьям нергенат ушештарыш.
Угыч мурсем шоктыш. Погынышо-влак ончык гитаре дене Геннадий Григорьев лекте. «Поэт Аркадий Букетовын почеламутшо-влак мыланем лишыл улыт, мыят ялыште илен кушкынам, садланак почеламутысо кажне корныжо чонышкем пура», – тыге каласышат, «Шып велеш лум» мурыжым мураш тӱҥале. Ачамым шарналтен, шинчавӱдемат лекте. Вара руш поэт Александр Тарасов «Жаворонок» да «Сердце матери» почеламутлам пеш сылнын лудын пуыш. Уна семын толшо Людмила Никонова, книга гыч «Песня о Йошкар-Оле» почеламутым ойырен налын, уло кумылын лудын пуыш. Уэш Константин Шемякин кидышкыже гитарым кучыш, тунамак ныжылге сем йоҥгалте, мероприятий деч ончыч гына шочшо «Доброта» муро кажнынан шӱмешна логале. «Аркадий Букетовын «Пиалан улам» почеламутшым лудын лекмек, ушыштем вигак сем лекте. Уста лирикын поэзий аршашыже семым возаш да мураш таратыш», – шарналтыш Геннадий Куклин, тудат мурпӧлек дене толын.
Касыште Алексей Веселов, Сергей Никонов, Зоя Королева ачамын почеламутшо-влакым лудыч. Марий мурызо-влак Александр Мамаевын, Майя Ахметянован, руш мурызо Алла Торопован сылне йӱкышт арт-кафе мучко ийын кайышт.
Лӱмгече сынан поэзий пайремышке толшо кажне уналан Аркадий Букетовын книгажым пӧлеклышым.
Л.СЕМЕНОВА
