Пытартыш жапыште емыжым ма поҥгым погаш кайыше-влакын чодыраште йоммышт нерген увер чӱчкыдын шокта. Тыгай азапыш логалаш огыл манын, мом эн ончычак шотыш налман?
О.ДАНИЛОВА.
Йошкар-Ола.
Йодышлан Россий МЧС-ын Марий Элысе тӱҥ виктемыштыже тыге вашештеныт:
– Марий чодыра поян, да калык тушко эр шошо гыч тӱҥалын лум вочмеш гаяк тӱрлӧ кушкылым, саскам да поҥгым погаш коштеш. Коклаштышт йомшо-шамычат улыт – тургыжландарыше тыгай сӱрет поснак шыжым палдырна.
Чодыраште йомаш огыл манын, нине ой-каҥаш-влакым шотыш налаш темлена:
- кушкылым, емыжым але поҥгым погаш тарванымыда годым лишыл еҥда-влаклан кушко кайымыда да кунам пӧртылаш шонымыда нерген шижтарыза;
- синоптик-влакын увертарымыштым колыштса да игечылан келшышын чийыза – чодыраште волгыдо вургем торашкырак коеш;
- пелен шырпым, шӱшпыкым, кӱзым, эмым, вӱдым да кочкышым налза;
- шагал палыме але икмыняр ийыште кугун вашталтше чодыраш ида пуро;
- шкан гына ида ӱшане, компас да навигатор гай арвер дене пайдаланыза;
- родо-тукымлан, лишыл еҥлан, утарыше службын але элгӧргӧ паша пӧлкан пашаеҥыштлан йыҥгыртен керташ манын, пелен коштыктымо телефоным зарядитлыза;
- чодырашке изирак йоча-шамыч дене кайыме годым нуным шинча ончылно кучыза, куштырак коштмыштым палаш манын, жапын-жапын лӱмышт дене кычкыралза;
- кугурак йоча-влаклан шольышт ден шӱжарыштым ида ӱшане – поҥгым але емыжым куанен погымышт годым нунын нерген монден кертыт;
- йоча-шамычым чодырам сайын палем манше илалше еҥ денат ида колто: провор уныкам чылаж годымак эскерен шукташ неле. А, йомдарымеке, илалше еҥ ньогам ӧрткышыла кычалаш тӱҥалеш да пич чодыраш пурен шогалмыжым огешат шиж. Тыге утарыше ден правам аралыше органын пашаеҥже-влаклан йочамат, илалше еҥымат кычалашышт логалеш;
- илалше еҥ-влакым шкетыштым чодырашке колташ огеш темлалт;
- чодыраште йоммым умылымеке, ида ӧрткӧ, а шкем кидыш налза да йӱк-йӱаным колыштса. Йӧн уло гын, кӱкшӧ пушеҥгыш кӱзыза да йырваш ончалза. Кычкырен, йӱкда оралгыме годым шӱшпык дене пайдаланыза. Мӧҥгыш корным кече почеш муаш тыршыза. Калык деке тыгак эҥер, электропередаче линий, газ пуч, кӱртньыгорно луктын кертыт;
- корным муын огыдал да чодыраште йӱдлан кодында гын, кугу пушеҥге воктене тулым ылыжтыза. Шкеже тул велыш савырнен вочса, но пеҥгыдынжак ида мале – ала тендам кычалыт.
Лишыл еҥда чодыра гыч пӧртылын огыл гын, жапым шуйкалыде, полицийыш увертарыза.
Маргарита ИВАНОВА ямдылен.
Россий МЧС-ын Марий Элысе виктемжын пресс-службыжын фотожо.
