УВЕР ЙОГЫН

Пашам тыршен ыштыме аклалтде ок код

 

Чонжо дене эре ончылно: Медведево район Руэм посёлкысо йочасад вуйлатыше Ольга Уразаева Президентын Тауштымашыжым сулен.

 

4 ноябрьыште, Калыкын икоян улмо кечын да Марий Эл Республикын шочмо кечынже, Йошкар-Олаште пашашт дене ойыртемалтше еҥ-влаклан кӱкшӧ наградым кучыктеныт. Нунын кокла гыч иктыже – Медведево район Руэм посёлкысо «Лесная сказка» йочасадын вуйлатышыже, «Единый Россий» партий деч верысе ял шотан илемын депутатше, Российысе ӱдырамаш-влакын ушемыштын Марий Элысе отделенийжым вуйлатышын алмаштышыже Ольга Уразаева. Тудо социально кӱлешан мероприятийым ямдылымылан да эртарымылан, тыгак СВО-лан  полшымо шотышто надыржылан Россий Президент Владимир Путинын Тауштымашыж дене палемдалтын. Тиде да моло нергенат тудын дене мутланена.

 

– Тыгай кӱкшӧ акым могай пашам шуктымылан налмыдам рашрак умылаш манын, Ольга Васильевна, айста тӱҥалтыште илыш-корныдам кӱчыкын шергалына.

– Мый У Торъял район Шура ялыште шочынам. Ачамым, Василий Иванович Рыбаковым, тунамсе Горький лӱмеш Марий политехнический  институтым тунем пытарымыж деч вара тушко пашам ышташ колтеныт. Тыге тудо верысе совхозышто тӱҥ инженер-механиклан тыршаш тӱҥалын. Тиде пагытыште ачам  ден авам ешым чумыреныт улмаш. Жап эртымеке, Йошкар-Олашке илаш кусненыт. Тушто ачам Марий кугыжаныш университетыште, авам тунамсе политехнический институтышто туныктеныт. Ачамын шочмо кундемышкыже пӧртылмыжӧ шуынат, 1991 ийыште ешна Кужэҥер район Тумньо ялыш илаш куснен. Тушто ачам «Эрык» лӱман кугу кресаньык озанлыкым почын да изи огыл кӱкшытыш шуын. Мемнан вольык, сурткайык шуко лийын. Кертмына семын меат, ныл йочашт, пашам ышташ полшенна.

– Вараже ачада ден авада тынарак йочам ашнаш налыныт.

–  Туге. 2007 ийыште нуно шольым ден шӱжарем таҥашрак икшыве-шамычым Лӱльпан йочапӧрт гыч конденыт. Мый тунам Марий кугыжаныш пединститутышто (кызыт университет — авт.) йот йылме факультетыште икымше курсышто тунемынам.

2009 ийыште вузым тунем пытарымекем, мыйым ты ийын Медведево поселкысо 6-шо номеран «Колокольчик» йочасад пелен почмо «Икшывым вияҥдыме рӱдерыш» англичан йылмым туныктышылан налыныт. Тиде ийынак марлан лектынам. 2011 ийыште икымше, 2014 ийыште кокымшо йочам ыштенам. Куд ий наре ончыч Руэмысе «Лесная сказка» йочасадым вуйлатышылан ӱжыныт, да мый кӧненам. Кызытат туштак ыштем. Тыгодым «Колокольчик» йочасадыште йот йылме кружокым вӱдем.

– Тунам улыжат 34 ияш лийында. Тыгай самырыкак вуйлатыме пашам шукташ тӱҥалаш лӱдмыла чучын огыл?

– Ончычшо тыгай шижмаш лийын, вет йочасад кугу, 350 икшыве коштеш. Но район администрацийын образований отделже велым кугу полыш, эҥертыш улмым паленам да кертам манын ӱшаненам.

– Российысе ӱдырамаш-влакын ушемыштын Марий Элысе отделенийышкыже кунам да кузе толында?

– Тиде кум ий ончыч лийын. Йочасад дене тӱрлӧ акций ден конкурсыш ушнымынам, поро кумылым ончыктымо пашам эртарымынам шотыш налын, тушко ушнаш мылам адакат районысо образований отдел гыч темленыт. А тунам ме СВО-лан полышым пуымо пашам чолган шуктенна. 2024 ийыште мыйым республикысе отделений вуйлатышын алмаштышыжлан сайленыт. Ты ийынак Российысе ӱдырамаш-влакын ушемыштын отчет съездышкышт Москвашке миенам. Тушто вес кундем-влакын паша опытышт дене палыме лийынам.

– Те чынже денак моткоч чолга улыда. Тыгай койышда ачада але авада деч утларак куснен? Шарнем, йочам ашнаш налмекышт, нунын дене вашлийынам ыле. Тунамак тидын нерген возаш манын мутланымына годым когыньыштынат чолга улмыштым шижынам ыле.

– Тиде чынак. Сандене когыньышт дечат, очыни. Авам, мутлан, школышто тунеммыж годымак тӱрлӧ мероприятийым вӱден, вузышто эре группыштын старостыжо лийын. 2008 ий июльышто кугу туткареш ӱмыржӧ кӱрылтын. Тунам ачамлан, нимом ончыде, тугаяк чулым да чолга лияшыже логалын, вет тудо шкетын кодын гынат, ашнаш налме ик йочамат мӧҥгеш пуымо нерген нигунам шоналтенат огыл.

– Те кызытат чыланат ака-шӱжар, иза-шольо семын келшен иледа?

– Туге. Ме тунамак икте-весе дене келшен илаш тӱҥалынна да але мартеат кажне пайремым пырля погынен эртарена. Изирак шӱжарна деч молыжо, кеч тудлан 26 иий темын, ешан улына, шкенан йочана-влак кушкыт. Туге гынат канышлан мӧҥгышкӧ ачана деке эре миен толына.

– Ынде Тенданат икшывыда-шамыч чолга улыт?

– Тыгеат каласаш лиеш. Индешымше классыште шинчымашым погышо Андрей эргына ден кудымшо классыште тунемше Настя ӱдырнат кадет улыт. Медведево поселкысо кумшо номеран школыштышт эртаралтше чыла мероприятийыш, акцийыш, конкурсыш ушнат да чолгалыкым ончыктат. Пелашем – военный. Очыни, тиде амал денат эргына БПЛА дене пайдаланаш туныктымо кружокыш кумылын коштеш. Настялан кушташ келша. Тудо ик ансамбльын участницыже.

– Специальный военный операцийыште улшо-влаклан полшаш тӱҥалаш шонымашда кузе шочын?

– Кузе специальный военный операций тӱҥалын, туге 2022 ий гычак тушко полышым колташ тӱҥалынна. Тидын шотышто нигӧн нимогай йодышыжат лектын огыл. Адакшым йочасад пашаеҥ-влакын лишыл еҥышт, икшыве-шамыч кокла гыч южыштын ачашт тушко каеныт, кӧжын ачаже, эргыже але пелашыже вуйым пыштеныт. Тыгай годым кузе ӧрдыжеш кодат? Сандене чылан умыленыт: полшаш кӱлеш, полшыман. Тыге ме ынде визымше ий «СВОих не бросаем» акцийым эртарена. Йочасад пашаеҥ-влак, икшыве-шамычын ача-авашт ты пашашке вигак ушненыт да гуманитар полышым чумырен колташ тӱҥалынна. Тудыжым кажне гана шукак погена. А погена кажне тылзын. Тиде кочкыш, эм, тӱрлӧ вургем улыт. Тыгак йодмо почеш генераторым, моло кӱлешым, тиддеч посна оксамат поген колтена. Пытартыш жапыште кумылан-влак окоплык сортам мӧҥгыштышт ышташ тӱҥалыныт. Молан мӧҥгыштышт, а садикыште огыл? Парафиным левыктыме годым пуш чот лектеш, да йоча-шамычлан зиян ынже лий манын, тыгай йӧным ойырен налынна. Ончыкыжым маскироватлыше сетьым пидаш тӱҥалаш шонена. 2024 ий шыже гыч «Единый Россий» партий деч Руэм ял шотан илемын депутатше улам да ты велымат кертме семын полышым пуаш тыршем.

– Элнан Президентшын Тауштымашыжым сулымо, очыни, кугу кугешнымашым луктеш?

– Туге. Но, вес велым, тиде – кугу ответственность. Ты кӱкшӧ ак эшеат чот пашам ышташ тарата. Тиде Тауштымаш дене палемдалтмаште йочасад пашаеҥ ден ача-ава-влакын надырышт моткоч кугу. Тудым ме пырля пашам ыштымына дене суленна. Наградым Российысе ӱдырамаш-влакын ушемыштын Марий Элысе отделенийже гоч пуэныт. Сандене, йӧн дене пайдаланен, отделений вуйлатышына Нина Павловна Ивановалан да поро пашам пырля шуктышо-влаклан чылаштлан эше ик гана кугу таум ойлем.

Любовь Камалетдинова

Фотом еш альбом гыч налме.

 

Добавить комментарий