Кугыжаныш Погынышто
Марий Эл Кугыжаныш Погынын председательже пелен чумырымо советын черетан заседанийже лийын. Тудым Анатолий Смирнов вӱден.
Совещанийыште парламент аппаратын ыштышаш пашаже-влакым каҥашеныт, эн тӱҥжӧ, мутат уке, Кугыжаныш Погынын VIII созыв депутат-влакын совещанийыштлан да законодательный органын у составшын икымше сессийжылан ямдылалтмаш.
Шукерте огыл сайлалтше депутат-влакын совещанийыштым 26 сентябрьыште эртараш палемдыме. Тачысе кечын оргкомитетын заседанийжын да кум пашаче группын проектышт-влакым ямдылат, икымше сессийым чумырымо кечым ойырат, икымше заседанийыште каҥашышаш проектлан постановленийышт-влакым рашемдат.
Советын еҥже-влак моло йодышламат лончыленыт. Кугыжаныш Погынын VII созыв вуйлатыше-влак лӱмеш пурышо кодшо обращений-влакым терген лекман. Кугыжаныш Погын председатель Анатолий Смирнов 19 сентябрьыште Киров олаште Юл кундем федерал округысо законодатель-влакын ассоциацийыштын черетан заседанийышкыже кайышаш йодышым онченыт.
Советын заседанийже нерген тичмашракын Кугыжаныш Погынын сайтыштыже https://gsmari.ru/about/info/news/5204/ ссылке почеш лудса.
Лидия СЕМЕНОВА
Фотом Кугыжаныш Погынын сайтше гыч налме
