Республик бюджетын проектше шотышто публичный колыштмаш тӱҥалын.
Марий Эл Кугыжаныш Погынын президиумжо латикымше сессийым иктешлен, республик бюджетын 2026-2028 ий-влаклан проектше дене пашам ыштыме радамым пеҥгыдемден да парламентын тенийлан пытартыш заседанийжым палемден.
2 декабрьыште эртараш палемдыме бюджет сессийлан ямдылалтме кышкарыште Бюджет да экономический политике комитет «Марий Эл Республикын 2026 ийлан да 2027 ден 2028 ий-влакын плановый пагытыштлан республик бюджетше нерген» законын проектше дене ыштышаш паша радамым темлен. Президиум бюджетын проектше шотышто публичный колыштмашым заочный формо дене 5 ноябрь 14 шагат гыч 12 ноябрь 14 шагат марте эртараш пунчалым луктын.
Увертарымашым, законопроектын текстшым да моло материалым Кугыжаныш Погынын официальный сайтыштыже да Марий Элын официальный интернет-порталыштыже вераҥдыме.
11 ноябрьыште Депутатын кечыже лиеш. Тушто парламентарий-влак регионым лишыл кум ийыште социально-экономический велым вияҥдыме радам нерген мутланат, тыгак республик бюджетын проектше дене лишкырак палыме лийыт.
Кугыжаныш Погынын тенийлан пытартыш сессийжым 25 декабрьыште эртараш палемдыме.
Маргарита ИВАНОВА.
