26 июльышто Э.Сапаев лӱмеш Марий кугыжаныш академический опер да балет театрыште Марий Эл Республик кугыжаныш кучемын законым лукшо органжылан 85 ий теммылан пӧлеклалтше торжественный заседаний эртен.
Тушто Марий АССР-ын тӱрлӧ созыв Верховный Советшын да Марий Элын тымарте чумырымо Кугыжаныш Погынжын депутатше, марий парламентын аппаратшын ветеранже, республик правительствын коллегийжын йыжыҥъеҥже, министрже, регионым вуйлатышын администрацийжын должностьышто улшо еҥже-шамыч, муниципальный образований-влакын вуйлатышышт, кугыжаныш кучемын федеральный органже-влакын территориальный органыштын, религиозный конфессийлан, Кугыжаныш шотлымо палатын, Рӱдӧ сайлыме комиссийын, Верховный судын, Профушем объединенийлан, Мер палатын, Молодежный парламентын вуйлатышышт ден представительышт, Марий Элыште айдемын праваже да амалкалчын праважым аралыме шотышто уполномоченный да журналист-шамыч участвоватленыт.
Депутат ден ӱжмӧ уна-влак Марий АССР-ын I созыв Верховный Советшын пашаж нерген каласкалыше архив документ ончерже дене палыме лийын кертыныт. Экспозицийыште депутатыш кандидат-влакын брошюрыштын оригиналыштым, личный листокыштым да икымше депутат-шамычын билетыштын образецыштым, заседаний-влакын стенограммышт ден протоколыштым да молымат ончыктеныт.
Торжественный заседанийым почмыж годым Кугыжаныш Погынын председательже Анатолий Смирнов республикыште илыше калыклан пашам пырля ыштымылан чон почын тауштен, Верховный Совет ден Кугыжаныш Погынын депутатше-влаклан – сайлыше-шамычын правашт ден интересыштым арален, россий кугыжанлыкым пеҥгыдемдаш да регионланна вияҥаш ӱшанле правовой базым ыштен, сай закон-влакым лукмылан.
Анатолий Васильевичын палемдымыж почеш, 85 ий жапыште марий парламентын кугу илыш, мер да политике школжым 1252 депутат эртен.
«Ме чыланат палена, депутат – тиде профессий огыл. Депутат пашалан ямдылыме специальный тунемме заведений уке. Депутатстве – тиде шке интересшым кучемын представительный органыштыже ончыкташ да аралаш ӱшаныше калыкын ончылныжо пеш кугу ответственность. Таче, простажак огыл жапыште, иквереш чумыргаш да элнан волгыдо илышыж верч кӱлешан кугыжаныш пунчал-влакым лукмаште политике негызнам да тидын шотышто кушкын шумынам пеҥгыдемдаш кӱлеш», – палемден законым лукшо органын вуйлатышыже.
Республикысе калыкым тургыжландарыше йодышлам решатлымаш, шочмо кундемын пӱрымашыж шотышто азапланымаш, кучем орган, граждан обществын институтшо-шамыч дене икте-весым умылымо вашкылым ыштымаш ончыкыжымат Кугыжаныш Погынын законым лукмо паша негызше лийыт, ӱшандарен А.Смирнов.
Торжественный мероприятийын участникше-шамычлан республикыштына законым лукшо органын шочмыжо да вияҥмыже, тудын Марий кундемын историйжын тӱрлӧ пагытыштыже шуктымо пашаж нерген «Калыкын интересше верч» фильмым ончыктеныт. Тушто тӱрлӧ созывын депутатше-влак паша лектышышт дене палдареныт.
Депутат ден уна-влакым марий парламентын чапле лӱмгечыж дене Марий Элым вуйлатыше Юрий Зайцев саламлен.
«Законым лукшо кучемын историйже Марий кундемын йол ӱмбак шогалме да вияҥме историйже дене чак кылдалтын. Депутатын пашаже калык ончылно мутым кучымо, законым лукмо пашан эллан да калыклан служитлымашке виктаралтше йӱлаже-влакым аралыме да шукемдыме дене ойыртемалтеш. Марий Элыште правовой базе ий еда уэмдалтеш, граждан-шамычын илышыштым саемдымашке, кучемын правительственный органже-влакым пеҥгыдемдымашке виктаралтше у законодательный акт-влак приниматлалтыт. Законым лукшо да исполнительный кучем, верласе шкевиктем орган-влак коклаште деловой да, икте весым умылен, пашам пырля ыштыме вашкыл шукертак пеҥгыдемын», – манын тудо да чыла депутатлан законым лукмо пашаште чолгалыкым ончыктымылан, республикын лӱмжым нӧлтымаште надырым пыштымылан тауштен, тазалыкым, Марий Эл ден Россий Федерацийын сай илышышт, элнан тӱзланымыж лӱмеш тыршыме пашаште сеҥымашым тыланен.
Ю.Зайцев Кугыжаныш Погынын председательже А.Смирновлан Марий Эл Республикын законодательствыжым, граждан обществым, парламент-влак кокласе кылым вияҥдымашке надырым пыштымыжлан да законностьым пеҥгыдемдымыжлан Тауштымо серышыжым кучыктен.
А.Смирноват парламентын икмыняр йыжыҥъеҥжым тӱрлӧ награде дене палемден: Кугыжаныш Погын председательын икымше алмаштышыже Владимир Мухиным – «Марий Эл законодательствым вияҥдымаште посна надырлан» отличий знак дене, Марий Эл правительстве председательын икымше алмаштышыже, VII созыв Кугыжаныш Погынын депутатше Евгений Кузьминым, Кугыжаныш Погынын депутатше-шамыч Евгений Кальянов ден Александр Павловым – «Марий Эл законодательствым вияҥдымаште надырлан» отличий знак дене.
Депутат корпуслан саламлыме да сеҥымашым тыланыме поро мут-влак Россий Федерацийын сенаторжо-влак Константин Косачёв да Сергей Мартынов, Кугыжаныш Думын депутатше Сергей Казанков дечат йоҥгалтыныт.
Нуно россий парламентын кок палатыжынат председательышт Валентина Матвиенко да Вячеслав Володин деч саламлымаш-шамычым лудыныт, тыгак марий законодатель-влакын Федеральный Погынымашын парламентарийже-шамыч дене пайдале вашкылыштым, регионысо илышын чыла сфержылан келшыше законым лукмыштым, кугурак инвестицийым кондымаште, республикыште национальный проект ден социально-экономический программе-влакым илышыш пуртымаште надырыштым палемденыт.
Марий парламентлан 85 ий темме лӱм дене Кугыжаныш Погынын депутатше-влак Аркадий Новиков, Геннадий Зубков, Михаил Швецов Кугыжаныш Думын профильный комитетше-шамычын Чап грамотышт да Таумутышт дене палемдалтыныт, аппаратын икмыняр кугыжаныш служащийже – Федераций Советын аппаратшын Грамотшо да Россий Федерацийын сенаторжо Сергей Мартыновын Тауштымо серышыж дене.
Заседаний марий артист-влакын концертышт да, театр тошкалтышыш шогалын, пырля войзалтме дене мучашлалтын.
М.ИВАНОВА
Д.Речкинын да Марий Эл Кугыжаныш Погынын пресс-службыж гыч налме фото
