Ончыкылык Марий парк кумдыкышто паша кая манаш гын – йоҥылыш, паша тыште эр годсекак шолеш! Вес семын ок лий, вет республикын кучемже ты объектым посна контрольышто куча. Адакшым ояр игече шога, йӱр тӱҥалме деч ончыч кажне шагатшым пайдалын кучылтман.
Марий парк чоҥалтме нерген уверым эскерыше-влак палат: тыште тӱҥалшым пыштыше подрядный организаций пашажым кудалтен каен, паша ик жаплан чарнен шогалын ыле. Сандене ты сомылым шке ӱмбакше налше «Ола» муниципал унитар предприятийлан, график гыч вараш кодаш огыл манын, чот тыршашыже перна.
– Тачысе кечын пашазе-влак рӱдӧ аллей корныш бетон йӧршан асфальтын икымше лончыжым шарат. Шола да пурла велышкыла наҥгайыше йолгорно-влакым асфальтым пышташ ямдылат. Сценым шогалтышаш кугу площадкым ямдылат, ты участкыште паша этап дене шукталтеш: ондак кумдыкым тӧремдыме, вара тушко ошмам, пытартышлан тыгыде кӱм оптат, – умылтарыш «Ола» МУП-ын пресс-секретарьже Наталья Рзаева. – – Кужемдыме паша кечыш кусненна, тудо эрдене 7 шагатлан тӱҥалеш да 18, а кунамже 19 шагат марте шуйна. Палемдыме срокышто ыштен шукташ манын, шуматкечынат пашаш лекташ перна. Чоҥышаш материалым шупшыктымо годым оласе транспорт кудалыштмым чарнымек, шукырак рейсым ышташ манын, машинам виктарыше-влак эсогыл 4 шагат эрдене пашам тӱҥалыныт.
Мутшо почеш, объектыште кажне кечын тӱрлӧ специальностян 50 пашаеҥ тырша, 8 единице техникым лукмо. Паша шолеш, маньым. Чынжымак, ик вере экскаватор мландым кӱнча, самосвал ден КамАЗ автомашина-влак чоҥышаш материалым шупшыктат, тыштак погрузчик, бульдозер мӱгырат – паша чылалан сита.
Ушештарена, Марий паркым тӱзатыме паша «Оласе средам йӧнаным ыштымаш» федеральный проект дене келшышын шукталтеш. Тудын верч 4 тӱжем утла еҥ шке йӱкшым пуэн. Чыла сай лиеш да игече чаракым ок ыште гын, пашан икымше этапше тений октябрь тӱҥалтыште мучашлалтшаш.
Л.СЕМЕНОВА
Авторын фотожо
