Республикысе курчак театр калык ончыко у спектакльым лукташ ямдылалтеш.
Тудо «Сны» маналтеш. Спектакльым Иван Бунинын «Темные аллеи» ойлымаш-влак циклже гыч «Натали», «Степа», «Таня», «Руся», «Качели» да «Мадрид» новеллыже-влак негызеш шындыме. Тудым ямдылымаште Казань гыч постановочный команде тыршен, тиде – режиссер, Марий Эл искусствын сулло деятельже Татьяна Лядова, художник Алиса Гулканян, семым келыштарыше, Татарстанын тӱвыражын сулло пашаеҥже Эльвира Камалова, пластике шотышто Ангелина Шастова ден Александра Чикильдина.
22 августышто СМИ-лан тиде спектакльым посна ончыктышт. А премьерже 26 сентябрьыште лиеш.
Режиссер Татьяна Лядова деч молан лачшымак ты авторын нине произведенийже-влакым ойырен налме манын йодмылан тыге вашештыш:
– Бунинын произведенийже-влак почеш спектакльым театрлаште шагал шындат. А мемнан революций деч ончычсо Российыш, Бунин деке пӧртылмӧ шуын. Спектакльыште йӧратымашым ӱдыр-влакын шижмашышт гоч ончыкташ тыршенна. Адакшым тушто кресаньыкат, помещицат, интеллигенцият улыт. Тудым ямдылыме годым актер-влак дене йӧратымаш шижмаш дене кылдалтше йодыш нерген шагал огыл ӱчашенна, икте-весылан мом-гынат умылтараш тыршенна. Тиде спектакльым ятыр ий ончыч диплом паша семын ямдыленна ыле. А кызыт профессиональный сценыш кусаренна.
Спектакльым ончымо деч вара еҥ-влакын, поснак самырык-шамычын, Бунынын возымыжым лудаш кумылаҥдаш шонымаш денат тидым ыштыме.
Спектакльыште тӱрлӧ ойыртемалтше йӧным кучылтмо. Тушто реквизит моткоч шагал. Сценыште эре ик декорацияк гына – тиде ик шкаф-омса, ик пӱкен, вешалкыште кечыше шинель гай ик пальто, ик йоча пинчак, куд теҥгыл да вошткойшо икмыняр ош занавеске. Да чылаж денат моткочак келшен толшын пайдаланат. Нунын кокла гыч ниможат йӧршынат уто огыл. Мӧҥгешла, кажныже сюжетым почын пуаш полша. Поснак теҥгыл-шамычым моштен кучылтмо. Нуно ик мужыр нерген каласкалыше сӱретыште шинчаш теҥгылак улыт, вес ужашыште – вакшыш, кумшышто – школ доска, нылымшыште – ӱстел, визымшыште – пырдыж, кудымшышто – пуш. Вет спектакльыштыжат куд мужырынак йӧратымаш кылже ончыкталтеш. Сандене ты шотышто режиссерын усталыкшым, мастарлыкшым да талантшым палемдыде нигузе огеш лий.
Тиде спектакльым ойыртемалтше йӧн-влакым кучылтмо шотышто ончаш оҥай. Сюжетшат шке ончышыжым муэш, шонем. Такшым тудо – 16+. Кугыеҥ-влаклан.
Любовь Камалетдинова
Авторын фотожо
