Йошкар-Олаште 2023 ийлан да плановый 2024 да 2025 ийлан бюджет проект-влакым каҥашеныт.
Тӱҥ докладым ола администрацийын финанс управленийжын начальникше Юлия Торощина ыштен. Шушаш ийлан 5 млрд. 878,4 млн. теҥге кугытан бюджет палемдалтын, роскот ужаш парыш деч шукырак, дефицит 47,1 млн.теҥгеш шуэш. 2024-2025 ийлан бюджетым балансыш кондымо, тугеже роскот да парыш ужаш-влак икгай лийшаш улыт.
Молгунамасе семынак, олан казнаже социальный илышым саемдымашке виктаралтын: 66,5 процентше бюджет сферылан ойыралтеш, окса дене ончымаште, тиде – 3 млрд. 942,5 млн. теҥге. Национальный проектлашке ушнымаш – бюджетым пойдарыме ик ӱшанле йӧн. Вес ийын 5 проект почеш 1 млрд. 258,9 млн. теҥгем ыштен налаш палемдыме. Тышеч 896,7 млн. теҥгеже корным тӧрлаш ойыралтшаш, тыгак Йошкар-Оласе очистной сооружений-влакым уэмдаш, аварий лӱдыкшан пӧртла гыч еҥ-влакым вес вере кусараш, калык тӱшкан коштмо кумдыклам тӱзаташ кучылталтшаш.
Школ-влакым капитально олмыктымо, «Восточный» микрорайонышто школым чоҥымо проект да смете документацийлам ышташ бюджет инвестицийым палемдыме, 68 йочасадыште да муниципал школлаште видеодомофоным шындат. Кудывечылам да квартал-влак кокласе кумдыклам тӱзаташ да шотышто кучаш 37 миллион теҥгем ойыраш палемдыме.
Транспорт роскотлан палемдыме 162,1 млн. теҥге окса «Троллейбус парк» предприятийын парымжым субсидироватлаш, лизинг йӧн дене кызыт марте налме троллейбус-влакын акыштым тӱлаш, контакт сетьым шупшаш кучылталтеш. Пенсионер да тунемше-влак тӱшка транспортышто кудалыштме льгот аралалтеш.
Бюджет проектым каҥашымаште «Йошкар-Ола» ола округын вуйлатышыже Виктор Кузнецов, Марий Эл Кугыжаныш Погынын да Йошкар-Оласе погынымашын депутатышт-влак, администрацийын еҥышт, тӱрлӧ мер организаций, предприятий да учреждений вуйлатыше-влак, Йошкар-Олаште илыше-шамыч лийыныт. Публичный колыштмашым мэр Евгений Маслов вӱден.
Йошкар-Ола администрацийын соцлаштыкысе уверже негызеш Л.СЕМЕНОВА ямдылен
