Шукерте огыл Марий Элын Кугыжаныш Погынышкыжо да верысе кучем органлашке депутат-влакым сайлышна. Тушко тӱрлӧ политический партий деч СВО-н участникше-шамычат ушненыт. Нунын дене Марий вуйлатыше Юрий Зайцев вашлийын.
Вашлиймаште Марий Эл гыч СВО-ш кайыше-влаклан республик деч гуманитар полышым пуымо, кундемнам вияҥдыме дене кылдалтше да моло йодыш-влакым каҥашеныт.
Юрий Зайцев палемден: элналан да армийлан таче кугыжанышын социальный обязательствыжым сайын шуктен кертше ӱшанле тыл кӱлеш, политический партий-шамычат чылан пырля пашам ыштышаш улыт. «Мемнан ик цель – элна сеҥышаш», – каласен Юрий Зайцев.
Каҥашыме ик йодышыжо СВО-н боевой действий кайыме районлаште улшо участник-влаклан да нунын ешыштлан полышым пуымо дене кылдалтын. Ты шотышто республикыште боец-влаклан да нунын ешыштлан социальный полышым пуымо шотышто шуко ышталтеш: ик гана пуымо выплате гыч тӱҥалын, тазалыкым пеҥгыдемдаш полшымо марте. Регион вуйлатышын палемдымыж почеш, кӧ шкежак СВО-што лийын, вара тышке пӧртылмеке, нелылык дене вашлиялтын, тыгай еҥ-влакын темлымашышт ты шотышто моткоч кӱлешан.
«Кызытат спецопераций гыч пӧртылшӧ-влаклан психологический, профессиональный, социальный полышым пуымо шотышто йодыш пӱсын шога. Кучем орган, мер ушем-влаклан ты шотышто кузе пашам саемден колташ лийме шотышто тендан темлымаш-влак уто огыт лий», – ешарен Юрий Зайцев.
Вашлиймаште тудо Россий Президент Владимир Путинын ойлымыжымат ушештарен: СВО участник-влак Российын элитыжлан шотлалтшаш, тудым вуйлатыме пашаште, кугурак проектлаште участвоватлышаш улыт. Регион вуйлатышын мутшо почеш, боевой братство политический системышкат шке надыржым пышта да регионлан вияҥаш полша.
Марий Эл вуйлатышын пресс-службыжын уверже негызеш Светлана Носова ямдылен.
Д.Речкинын фотожо
