«Энергокружок»
«Нуно ончыкылыкна улыт»
«Мариэнергон» пашаеҥже-влак Йошкар-Оласе 30-шо номеран кыдалаш школын 9-ше классыштыже тунемше да «Энергокружокыш» коштшо-влак дене профориентаций пашам шуктеныт.
Нуно тышке идалыкаш пашам иктешлаш «Энергокружок» вуйлатыше да физикым туныктышо Татьяна Яранцеван вуйлатымыж почеш погыненыт. Эртыше тылзе-влак экспериментлан, лабораторий опытлан поян лийыныт. Тунемше-влак шке туныктышышт да энергокомпанийын специалистше-влакын полшымышт дене профессийыш икымше ошкылым ыштеныт.
Тыгай шонымаш денак нуно физикым да электроэнергетике негызым чын кейслаште тунемыныт, оборудований дене палыме лийыныт, тӱрлӧ оҥай мероприятий ден энергетике квизлашке, олимпиаде ден конкурслашке ушненыт, компанийыш миен коштыныт, «Мариэнерго» филиалын историйже да пашаж дене палласеныт, тыгак лӱман стипендийым налыныт. Кугу Отечественный сарыште сеҥымылан 80 ий темме вашеш йоча-влаклан мастер-классым эртарыме, нуно Йошкар-Оласе ик трансформатор подстанцийын пырдыжшым тематике почеш сӱретлыме пашаш ушненыт.
«Энергокружок» проект сезоным петырымаш самырык шымлызе-влаклан электроэнергетике дене палыме лийме икымше йыжыҥым иктешлымаш гай лийын. Индешымше классыште тунемше-влакым наградитлымаш поснак оҥайын эртен: кажныже программым эртыме нерген сертификатым да организатор-влак деч шарнымашан пӧлекым налын.
«Нине тунемше-влак профессийыш икымше ошкылым веле огыл ыштеныт, нуно мемнан ончыкылыкна улыт. Ме ӱшанена: шушаш жапыште нуно инженер да ончыкылык энергетикым ыштыше лийыт», – каласен «Рӱдӧ да Юл кундем Россеть» ПАО-н «Мариэнерго» филиалжын директоржо Сергей Хлусов.
Юрий ИСАКОВ.
Снимкыште: «Энергокружок» нуным ушен.
Фотом «Мариэнергон» пресс-службыж деч налме.
