Тений Российыште ӱдырамаш ден пӧръеҥ-влакын тазалыкыштым аклышашлан азам ыштен кертме ийготан граждан-шамычлан лӱмынак диспансеризацийым эртарат.
Диспансеризацийын кышкарышкыже лачшымак могай шымлымаш-влакым пуртымо? Тидын дене Марий Эл Тазалык аралтыш министерствын медицине профилактике шотышто тӱҥ специалистше Наталья ЧЕГАЕВА (снимкыште) палдара:
– Россий Федерацийын президентше Владимир Путин ешым чапландарыме да тудлан полшымо шот дене 2024 ийым Ешын идалыкше семын увертарен. Тудын кышкарышкыже кугыжаныш демографий показательым саемдымашке, аза шочмо чотым кугемдымашке виктаралтше мере-влакымат пурташ палемден.
Граждан-влаклан 2024 ийыште да плановыйлан шотлалтше 2025-2026 ийлаште медицине полышым яра пуымо кугыжаныш гарантий программыш азам ыштен кертше ӱдырамаш ден пӧръеҥ-шамычлан профосмотр ден диспансеризацийым пуртымо. Тудо палемдыме еҥ-влакын тазалыкыштым келгынрак шымлымашке: азам ыштен кертме куатыштым аклымашке, мӱшкыраҥаш да мӱшкыраҥдаш, йочам ыштыме марте уто-сите деч посна кошташ, аза шочмо деч вара пеҥгыдемаш чаракым ыштыше чер-влакым рашемдашке – виктаралтын.
Азам ыштен кертме тазалыкым аклыме шымлымаш-влак ден медицине велым эмлыме радам уло.
Диспансеризацийын икымше йыжыҥыштыже ӱдырамаш-влакым:
- акушер-гинеколог онча;
- шӧртум парня дене темдыштын тергат;
- авагудо шейкым ончат, тыгодым эше биоматериалым шымлаш налыт;
- мазокым микроскоп полшымо дене шымлат;
- авагудо шейке да цервикальный канал гыч мазокым цитологий велым шымлаш налыт;
- 18-29 ияш ӱдырамаш-шамычын мазокыштым лабораторийыште инфекциян чер-влакын возбудительыштлан тергат.
Диспансеризацийын икымше йыжыҥыштыже пӧръеҥ-влакым:
- врач-уролог (тудо уке гын – пӧръеҥын ӱдырамашым мӱшкыраҥден кертме тазалыкше шотышто ямдылыме врач-хирург) онча.
Диспансеризацийын икымше йыжыҥжым иктешлыме почеш граждан-влакым кокымшо йыжыҥыште келгынрак да радамынрак шымлалташ, диагнозым пеҥгыдемдаш колтен кертыт.
Ӱдырамаш-влаклан палемдалтше кокымшо йыжыҥыш пуртымо:
- 30-49 ияш-шамычын мазокыштым лабораторийыште инфекциян чер-шамычын возбудительыштлан тергымашым;
- кутан кундемысе орган-влакым ультрайӱк йӧн дене шымлымашым;
- шӧртум ультрайӱк полшымо дене тергымашым;
- акушер-гинекологын эше ик приёмжым.
Пӧръеҥ-влаклан палемдалтше кокымшо йыжыҥыш пуртымо:
- спермограммым;
- микрофлорым микроскоп гоч шымлымашым але лабораторийыште инфекциян чер-влакын возбудительыштлан тергымашым;
- предстательный ту ден половой орган-шамычым ультрайӱк полшымо дене шымлымашым;
- врач-урологын (тудо уке гын – пӧръеҥын ӱдырамашым мӱшкыраҥден кертме тазалыкше шотышто ямдылыме врач-хирургын) эше ик приёмжым.
М.ИВАНОВА ямдылен
Марий Эл Тазалык аралтыш министерствын фотожо
