Кодшо кечылаште тыгай лӱман республиканский конкурсын финалже лийын. Тудым Йоча да подростко-влакын организацийыштын «Эр вий» ушемышт эртарен.
Тений конкурсышто кок номинаций лийын: «Еш тоштер» да «Мемнан еш реликвий». Таҥасымашке 60 утла еш ушнен. Нунын кокла гыч финалыш 26 лектын.
«Еш тоштер» номинацийыште 16 еш кокла гыч жюри икымше вер дене иканаште кок ешым палемден – тиде Шернур район гыч Глазыринмытым (снимкыште) да Морко район гыч Захаровмытым. Кокымшо верыш кум еш лектын: Курыкмарий район гыч Васюткинмыт, Козьмодемьянск гыч Ерофеевмыт да Килемар район гыч Пахмутовмыт. Кумшо верым Йошкар-Ола гыч Рыбаковмыт сеҥен налыныт.
«Мемнан еш реликвий» номинацийыш еш-влак деч 22 фотосӱрет пурен. Нунын кокла гыч жюри Волжский район гыч Томцевмытын да Советский район гыч Салтаевмытын пашаштым эн сайлан шотлен. Кокымшо верыш Звенигово район гыч Чепиковмыт — Митрофановмыт еш лектын. Кумшо верым Йошкар-Ола гыч Свечниковмыт еш сеҥен налын. Йошкар-Оласе епархийын посна призше дене Козьмодемьянскысе приход гыч Макаровмыт еш палемдалтын.
Л.Камалетдинова
Фотом Глазыринмыт ешын архивше гыч налме
