Мошенник-шамыч деч кузе аралалтман? Оптышышкышт логалме деч мом ыштыман?
Нине йодыш-влак пытартыш жапыште, очыни, кажнынам тургыжландарат. Молан манаш гын мошенник-шамыч кече еда манме гаяк еҥ-влакым ондалыме у деч у йӧным шонен муыт.
Мутлан, тыланда палыдыме еҥ йыҥгырта да следователь улмыж нерген ойла. Икмыняр жап гыч тудо банкын але вес организацийын я ведомствын пашаеҥжылан кусара.
Тыгай годым мом ыштыман? Телефон кнопкым темдалман да мутланымым чарныман. Тиде мошенник-шамыч тендам ондалаш тӧчат.
Нунын сценарийышт тӱҥ шотышто икгай: ик «специалист» дене мутланымеке, вес еҥ йыҥгырта да правам аралыше органын пашаеҥже улмыж нерген каласа. Тыгодым увертара: кызыт гына тендан дене мошенник мутланен, тудо оксадам ондален налнеже. Тылеч вара «банк пашаеҥ» йыҥгырта да оксадам «аралыме счётыш» але «лӱдыкшыдымӧ счётыш» колташ темла.
Шарныман:
- ик еҥ дене мутланыме жапыште вигак иканаште тӱрлӧ ведомство дене кылым ышташ да кутыраш нигузе огеш лий!
- Кугыжаныш структур пашаеҥ-влак оксам кусаркалаш огыт темле;
- посна «аралыме счёт» ден «лӱдыкшыдымӧ счёт» уке!
Любовь Камалетдинова.
Авторын фотожо.
