Моторлыкым пӧлекленыт
Ӱдырамаш-влакын тӱнямбал кечышт вашеш Кундыштӱр да Шоя-Кузнецово интернат-пӧртлаште «Пӧлекле мыланем моторлыкым!» поро кумыл акций эртен. Пайрем кечын интернат-пӧрт-влак импровизироватлыме моторлык салоныш савырненыт. Социальный тӧнежлаште илыше ӱдырамаш-шамычлан парикмахер, визаж да маникюр мастарлыкыштым «Стрижка-Экспресс» салонын мастерже ден Йошкар-Оласе технологический колледжын да Сервис технологий-влак техникумын тунемшыже-шамыч пӧлекленыт, да мотор причёскан да макияжан ӱдыр ден ӱдырамаш-влак пуйто йомакысе гай феяш савырненыт. «Моторлыкым поро кумылын пӧлеклыме кечым республикыштына кокымшо гана эртарышна, – каласкала Марий Элын калык илышым саемдыме шотышто министрже Марина Островская. – Икте ончыч вожылын гын, весе вигак артистын кышкарышкыже пурен, но мероприятий кажне участниклан келшен! Социальный пӧртлаште илыше-влак кокла гыч пеш шагалынже шканышт ӱшанат, да тиде мероприятийыш ушнымышт дене мотор да сымыстарыше улмыштым умылат!» Кызытсе мастер-шамыч чудым ыштен моштатак! Нуно, моторлыкым ужын, а ситыдымашым шылтен, кажне ӱдырамашым Пампалчыш савырат. «Мемнан дене республикнан тӱрлӧ кундемже гыч поро да чылалан ӱшаныше ӱдырамаш-влак илат, – манеш Кундыштӱр интернат-пӧртын директоржо Михаил Туев. – Нуно тӱрлӧ ийготан улыт, туге гынат кажныже мотор лийнеже. Интернат-пӧртыштына моторлык пайремын йӱлаш пурымыжлан моткоч куаненна». «Мемнан дене усталык мероприятий-влак чӱчкыдын эртат, сандене тушто чыланат моторын кояш тыршат. Парикмахер, визаж да маникюр мастер-шамыч ӱдырамашна-влакым сылнештарымышт деч посна эше шкем эскерыме у тенденций да ойыртем-шамыч дене палдареныт», – акцийым иктешла Шоя-Кузнецово интернат-пӧртым вуйлатыше Антон Соколов. Палынак мотор улмым ужын куаныше ӱдырамаш-влакым эше фотографироватленыт! «Пӧлекле мыланем моторлыкым!» акций тидын дене гына мучашлалтын огыл, 9 мартыште «Селебрети» моторлык салон тыгак шуко шочшан ава-влакым куандарен. |
М.ИВАНОВА
Фотом Марий Элын Калык илышым саемдыме шотышто министерствыжын сайтше гыч налме