Лидия Шабдарова
Кодшо изарнян Йошкар-Олаште Самырык-влакын полатыштышт «МарГУ-н миссше – 2026» конкурсын финалже эртен.
Университетын эн мотор да пӱсӧ уш-акылан ӱдырын лӱмжым налме верч 16 Пампалче таҥасен. Нуно вузын тӱрлӧ факультет ден институтлаштыже тунемыт. Тылзе жапыште ӱдыр-влак шоулан кыртмен ямдылалтыныт. Кажне кечын репетиций, дефиле лийыныт, куштымо номерым тунемыныт да хореограф-влак дене пашам ыштеныт.
Туныктымо программат поян лийын. Участнице-шамыч актёр мастарлыклан, сценыште мутланаш, шкенышт дене палдараш тунемыныт, уш-акыл пӱсылыкыштым шкешотан викториныште ончыктеныт.
Тений конкурс Российысе калык-влакын икоян улмо идалыклан пӧлеклалтын. Ты мероприятий калык-влак коклаште икоян улмым, келшымашым пеҥгыдемдаш, тӱвыра поянлыкым арален кодаш да вияҥдаш шонымаш дене эртаралтын. Конкурс мучко Российыште илыше, тыгодымак тӱрлӧ калык гыч лекше да вес элын моторжо-влак икте-весылан полшеныт, келшымаш кыл коклаштышт сайынак шижалтын.
Жюрилан ик эн сайжым ойырен налаш моткочак неле лийын. Сеҥышыш физике ден математике факультетын икымше курсыштыжо тунемше Анастасия Попцова лектын. Икымше вице-мисс лӱмым София Досманова налын (Калыкле тӱвыра да тӱвыра кокласе коммуникаций институт). Кокымшо вице-мисс лӱмым Сатьясри Раджагопал (Медицине институт) ден Ольга Сусловалан (историй ден филологий факультет) пуэныт.
Фотом университетын воткыл лаштыкше гыч налме.
