Марий Эл гыч 20 йоча Москвасе Кремльыште эртыше ёлкышто лийын.
Россий президентын тӱҥалтышыже почеш эртаралтше пайрем мероприятий элнан чыла регионжо, тыгак Абхазий, Касвел Осетий, Приднестровье гыч 5000 наре ӱдыр-рвезым иквереш чумырен. Нунын коклаште специальный военный операцийын геройжо-влакын икшывышт, тунеммаште ончылно улшо, спортсмен, чолга ӱдыр-рвезе-шамыч лийыныт.
Кремльысе ёлко тӱҥалме деч ончыч конкурс, модыш-влак эртаралтыныт. Тыгак йоча-влаклан Москвариумышто – Европысо ик эн кугу океанариумышто – лияш йӧным ыштеныт.
Пайрем кастене чыланат келшымаш, нелылыкым сеҥымаш нерген «Заветные куранты» йомакым ончыктеныт.
Г.Кожевникова
Фотом Марий Эл Образований да науко министерствын соцкылысе лаштыкше гыч налме
