12-13 майыште Россий калык-влак ассамблейын тӱҥалтышыж почеш Тверь областьыште «Одна на всех» патриот акций эртен.
Шочмо элым аралышын идалыкшылан да Кугу Ачамланде сарыште сеҥымылан 80 ий теммылан пӧлеклалтше мероприятийыш федерал кӱкшытан калыкле-тӱвыра автономийым вуйлатыше, Россий президент пеленысе Калык-влакын пашашт шотышто советын йыжыҥъеҥже, сенатор, Россий калык-влак ассамблейын советше ден президиумжын, Россий Обороно министерствын князь Александр Невский лӱмеш военный университетшын еҥже-влак ушненыт. Нунын коклаште Марий Эл Кугыжаныш Погын председательын икымше алмаштышыже, Россий президент пеленысе Калык-влак кокласе кыл шотышто советын йыжыҥъеҥже, Россий калык-влак ассамблейын регионысо пӧлкажын да Российысе марий-шамычын федерал калыкле-тӱвыра автономийыштын председательже Лариса Яковлева лийын.
Тӱрлӧ калыкын еҥже-влак ассамблейын генеральный директоржо Александр Дарковичын вуйлатымыж почеш Москва гыч Тверь марте патриот маршрут дене кудал эртеныт. Тыгодым нуно Россий военный историйын сарзе чап дене кылдалтше икмыняр верыштыже лийыныт.
Вес кечын Тверьыште «Одна на всех» военно-исторический конференций лийын. Акцийын участникше-влак тыгак оласе «Россия – моя история» мультимедийный паркыште, суворов училищыште лийыныт да Тверь областьын калык-влак кокласе активше дене вашлийыныт.
– Акцийыш ушнышо-влак Кугу Ачамланде сарын ветеранже-влакым пагален да вуйым савен шарналтышна. Элнан пӱрымашыж дене кылдалтше кредалмаш лийме верлашке миен коштна. Мыйын шонымаште, чыла тиде историйын чынжым арален кодаш, калык-влак коклаште иза-шольо семын эшеат пеҥгыдемаш да икте-весым пагалаш полша, – Тверь областьыш миен коштмыжым иктешла Лариса Яковлева.
Маргарита ИВАНОВА
Марий Эл Кугыжаныш Погынын сайтше гыч налме фото.
